Gaur 13:00etan prentsaurrekoa eskaini dute Tubacex taldeko eskualdeko langileen ordezkari sindikalek. Iragarri dutenez, irailaren 17an manifestazioa egingo dute eta Aiaraldeko sektore ekonomiko zein sozial orori eskatu diete mobilizazioan parte hartzea eta babestea.
Izan ere, sindikatuentzat kaleratzeek eragin "hilgarria" izan dezakete eskualdeko "tabernetan, dendetan supermerkatuetan edo edozein establezimendutan". Bide batez, gogoratu dute jadanik Aiaraldeko langabeziko tasaren batezbestekoa %15ekoa dela.
Zuzendaritzaren helburuak
Langile batzordearen aburuz, Tubacex taldeko zuzendaritzak kaleratzeak proposatu ditu "eskulana osatzen dugunon soldata-kostuak murrizteko". Batzordearen iritziz, egungo krisialdia koiunturala da, eta enpresako arduradunek nahi dute "erabaki handiak hartzen dituztenek eta ekoizpenak beste herrialde batzuetara eramateko erabakiak hartzen dituztenek beren poltsikoak gizentzen jarraitzea".
Adierazpenaren ondoren, prentsako galderei erantzunda, langile antolakundeek argitu dute enpresaren gastuen %16 besterik ez direla beharginen soldatak, baina zuzendaritzak esparru horretan soilik aurreikusi dituela murrizketak.
Eskualdean errotutako enpresa
Sindikatuek gogoratu dute Tubacex 1963an sortu zutela Aiaraldean eta krisialdi larriagoak gainditu dituela: "1992an oraingoa baino askoz ere egoera dramatikoagoa izanik, langileria batuaren babesarekin aurrera egitea lortu zen".
Horren harira, langile batzordeak azpimarratu du Tubacex eta Aceralavako lantegiek etekin handiak eman dituztela eta horri esker hedatu dela taldea beste herrialdetara: Estatu Batuak, Austria edota Italia.
Hala ere, Tubacexen pisua agerikoa da eskualdean eta aberastasuna sortzeko aktibo nagusia dela nabarmendu dute: "100 enpresa laguntzaile baino gehiago eta 1.000 pertsona baino gehiago zeharka igarotzen dira urtero gure enpresaren instalazioetatik. (...) Ezin ditugu ahaztu taldeko enpresa txikiagoak: Cotubes, Tubos Mecánicos eta TTA".
