Atzo Gasteizko Zaramaga auzunean dagoen pilotalekuan jokatu ziren Arabako lau t´erdiko finalak. Iker Larrazabalek lortu zuen eskualdera ekartzea kategoria absolutuko txapela 22-13 partida irabazi ondoren.
Hala ere, amurrioarrak atzo adierazi zion Aiaraldea Hedabideari ez zela garaipen erraza izan: "Txarto jolasten hasi naiz, eta 7-1 galtzen. Akats tontoak egin ditut hasieran. Gero jolastu dut lasaiago eta sake asko sartu ditut”.
Arabako Pilota Federazioak nabarmendu du Larrazabalek jakin izan zuela bere joko eredua erabiltzen, abiaduran oinarritua. Edonola ere, Carlos Ibañez aurkariak partida ona egin zuen, eta nekez lortu zuen Larrazabalek irabaztea.
Kadeteen kategorian ere Aiaraldeko txapelduna
Kadeteen mailak ere irabazle aiaraldearra izan zuen, Arkaitz Eskuza, hain zuzen. Herriaren Aretako klubaren jokalariak 22-8 gainditu zuen bere aurkaria. Arabako Federazioak azpimarratu du sake bikaina duela laudioarrak, beste hainbat bertuteren artean.
Azkenik, faboritoa bazen ere, Axular Alonsok ezin izan zuen gazte kategoriako txapela eskuratu. Antza, Asier del Campo lehikideak partida berari gehien komeni zitzaion norabidera eraman zuen.