ELAk oharra plazaratu du Tubacexeko zuzendaritzak eginiko azken proposamena baloratzeko. Sindikatuaren aburuz, enpresak proposatzen duena “aberrazioa” da. “Ezin dugu langileekiko errespetu falta hau asimilatu”.
Gauzak hala, proposamenari ezezkoa eman dietela jakinarazi dute, eta beste gauza bat jarri dute mahai gainean: “Tubacexeko goi zuzendaritzak dituen luxu eta pribilegioak, ezkutatzen direnak”.
Horietako batzuk zerrendatu dituzte oharrean: “San Mameseko palkoa, hotelen ordainketa enpresaren txartelarekin, akzioak eskuratzeko interesik gabeko maileguak, bulegoen alokairuak Derio eta Leioan...”.
Horrez gain, “ingeniaritza fiskala” egitea leporatu die sindikatuak enpresako buruei. “Lantegi batean egiten diren hodiak beste fabrika batzuetan fakturatzen dituzte; eta, modu horretan, zentro batzuk defizitarioak edo irabazien sortzaileak bilakatzen dituzte, euren interesen arabera”.
Horren adibide zehatz bat jarri dute: “Tubacex Tubos Inoxidables enpresan ekoitzitako OCTG hodiak taldearen beste enpresa batek saldu zituen, eta irabaziak ez ziren gure enpresetan geratu”. Enpresa taldeak iaz 11 milioi euro irabazi zituela eta kutxan une honetan 10 milioi dituela ere nabarmendu dute oharrean.
Ondorioz, sindikatuak uste du oraingo krisia “aldi baterako” dela, koronabirusak sortua delako. Gauzak hala, langileen ordezkariek nabarmendu dute ez dutelako inolako “berregituratzerik” onartuko, eta deia luzatu dute gaur Tubacexeko eskualdeko lantegietan egingo den lanuztera batzeko, eta arratsaldeko martxan eta mobilizazioan parte hartzeko.