Orozko ez ezik, beste herri batzuk ere batu egin dira Zaporeak elkarteak bultzatutako ekimenera. Izan ere, Moriako errefuxiatuen kanpaleku polemikoak sua hartu ostean, elkarteak euskal gizarteari proposatu dio bertan dauden 12.000 errefuxiatu baino gehiagori oinarrizko laguntza bideratzea.
Gauzak horrela, Amurrioko Bai Bada! liburu-dendan elkartasun puntua ezarri dute elikagaiak uzteko. Urriaren 3ra arte egongo da horretarako aukera Jose Medinabeitia kaleko 8. zenbakian. Ordutegia hurrengoa da; goizean 10:00etatik 13:30ak arte eta arratsaldean 17:00etatik 19:30ak arte.
Aiaran ere bi toki
Aiarako Udalerriak bi tokitan ahalbidetuko dute elkartasun ekimenean parte hartzea. Alde batetik, Etxaurren Ikastolan urriaren 2an, hau da, bihar, jasoko dituzte jakiak. Zehazki, bi ordu egongo dira horretarako, 15:30etatik, 17:30ra bitartean.
Hurrengo egunean, urriaren 3an, Luiaondoko Malato supermerkatuak hartuko du lekukoa. 10:00etatik 14:00ak arte izango da bilketa.
Elikagaiak
Zaporeak elkarteak Morian egiten duen lana errefuxiatuentzako otorduak prestatzean datza. Hori dela medio, hurrengo jakiak eskatu dizkiete kanpainan parte hartuko dutenei: arroza luzea, garbantzuak, dilistak, babarrunak, makarroiak, atuna, sardinak, oliba olioa, espezieak, esne hautsa eta barrita energetikoak.
Halaber, ekarpen ekonomikoak ere onartzen ditu elkarteak. Horretarako bi bide daude. Alde batetik, diru sarrera egitea Kutxabanken (ES32 2095 5011 80 9115250322) edo Laboral Kutxan (ES71 3035 0103 88 1030035880). Bestetik, Bizum kontua ere badute Zaporeakeko kideek: Zaporeak Proiektua – 00435.