24 orduko greba deitu berri du Tubacexeko Langile Batzordeak datorren asteko astearterako -urriak 6-. Lanuztea goizeko txanda aldaketan hasi eta egun bereko gaueko erreleboan amaituko da.
Langileen ordezkariek adierazi dute “arrazoiak soberan” daudela greba deitzeko. “Ezin dugu enpresaren jarrera onartu. Ibilbiderik eta zentzurik ez duen zerbait negoziatzeko bilerak deitzen dituzte”, salatu dute prentsa-ohar bidez.
Batzordeko kideek argi dute: “Badirudi COVID-19ak sortutako krisia baliatu nahi dutela enpresa euren nahietara berregituratzeko, euren poltsikoak gehiago puztu ahal izateko, etorkizunera begirako inolako planik gabe eta lantegien etorkizuna kolokan jarrita”.
Gauzak hala, zuzendaritza “zirkulu zikoitz” batean sartzen ari dela uste dute beharginek. Horren aurrean borrokan jarraituko dutela ziurtatu dute Batzordeko kideek, eta langile guztiei luzatu diete urriaren 6ko deialdira batzeko deia. “Greba ez da komitearen apeta”, nabarmendu dute, “guztion ahaleginarekin soilik lortuko dugu egoera honetatik ateratzea. Argi izan: borrokatzen duenak galdu dezake, baina borrokatzen ez duena galduta dago”.
Datorren asteartekoa Tubacexeko langileek egingo duten bigarren lanuztea izango da. Lehena irailaren 17an izan zen, eta jarraipena ia erabatekoa izan zen.