Laudioko, Aiarako, Urduñako eta Amurrioko Udal Osoko Bilkurek mozioak onartu dituzte pandemia aurretik C-3 linean zegoen zerbitzua abiatzea eskatzeko. Izan ere, egunero hainbat tren geratzen dira bertan behera.
Aiaran pasa den asteko udalbatzan eman zioten oniritzia talde guztiek mozioari. Laudion astelehenean egin zuen aurrera testuak alderdi guztien babesarekin, PSE-EErena izan ezik. Berez, ekimena EH Bilduk aurkeztu zuen, baina EAJrekin eta Omniarekin adostu zuten idazkia.
Urduñan eta Amurrion atzo eztabaidatu zen mozioa. Emaitza bera izan zen, alderdi guztiak egon ziren ados, sozialistak kenduta, Amurrioko kasuan.
Orozkon ere EH Bilduk mozioa eramango du hurrengo astean udalbatzara.
Renferi, ADIFi eta Garraio Ministerioari bideratu dituzte euren aldarrikapenak Laudioko zein Amurrioko Udalek
Egitasmoa jarraiki, udalek Renfe eta Garraio Ministerioari eskatuko diete itxialdia baino lehen zegoen tren zerbitzua berrezartzea. Halaber, C-3 linea lehiakorra izatea eta herritarren beharretara egokitzea exijituko diete erakunde horiei. Langile kopurua handitzea proposatuko dute horretarako.
Aurretik iragarri bezala, premiazko bilera eskatuko diete Renfe eta ADIFi eta mahai gainean jarriko dute inbertsioak egiteko beharra herrietako geltokien irisgarritasuna eta segurtasuna bermatuta egon dadin.
Azkenik, eskumen horiek Eusko Jaurlaritzari ematea aldarrikatuko dute udalek eta Bizkaiko zein Arabako Foru Aldundien parte hartzea iradokiko dute.
