Urrian hasi zen kirol denboraldi berria, baina aste gutxi iraun du Eskola kirolak martxan. Izan ere, COVID-19 birusak eragindako pandemiak bertan behera utzi ditu jarduera asko; kirolekoak barne. Aiaraldeko 17 talde eta klubek hartu dute parte "Bultza kirola Euskadi" dinamikan, oharrean adierazi dutenez.
"Ez dugu ulertzen kirol ekintzak eskola eta federatu mailan bertan behera uztea", salatu dute. Izan ere, koronabirusaren kutsatze maila kirol jardueretan %0.28 eta %0.30 bitartekoa da: "Beste arlo batzuetan kutsatzea altuagoa izan da, eta martxan daude".
Ildo beretik, denboraldia prestatzeko hartutako lan gehigarria kontuan ez izatea egotzi diote Eusko Jaurlaritzari, "3-4 aldiz biderakatu baita: dokumentazioa, ikastaroak...". Halaber, pandemia hasi zenetik umeek izandako mugapenak azaleratu dituzte: udalekurik eza, kirol eta kultur jardueren etetea... Ikasturte hasierarekin eskolara itzuli dira gazteak, "baina kirola bazterrean utzi dute Eusko Jaurlaritzak eta Aldundiek". Are, prebentzio neurri gisa, entrenatzea debekatu dute, "protokolo zehatzei aurre egiteko edozein gauza egin nahi dugunean". Horren adibidetzat jarri dute seinalizazioa, aforoak, desinfekzioa, tenperatura hartzea edota "erantzukizuna hartzea, azken finean".
Guzti hori, ordea, ez da aski izan "normaltasun berrira" egokitzeko."Ez digute utzi gure eskola-adina eta federatuak diren kirolariak entrenatzen", eta horrek klub eta elkarteak hustea ekarriko du, ohartarazi dutenez, jendea kiroletik aldentzea. "Administrazioek errazena egin dute, jakin gabe horrek zer nolako ondorioak izan ditzakeen". Hargatik, sinatzaileek kirol jarduerak seguruak izaten jarraitzeko neurriak hartuko dituztela berretsi dute, jarduerari ekiteko beharra azpimarratuta.
Eskualdean, 17 sinatzaile
Eskaerari batu diren eragileen artean, eskualdeko 17 kirol talde daude, modalitate oso anitzekoak. Ondorengoak dira manifestua sinatu duten eskualdeko taldeak:
- Amurrioko Aresketa Gimnasia KE
- Amurrioko Pilotazale Elkartea
- Amurrioko Tenis Kluba
- Kaskagorri (Areto futbola)
- Herriaren (Eskupilota)
- Taekwondo Laudio
- CD Laudio (Futbola)
- Ganbegi 6-2 HOckey Taldea
- Laudioko Lautxirrinka Kirol Kluba
- Igeriketa Laudio
- Sugarrak Laudio (Saskibaloia)
- Laudioko Tenis Kluba
- Urduñako Pilota Elkartea
- Atxulaur K.E (Futbola)
- Orozkoko Olgetan Euskal Pilota Kirol Elkartea