LAB sindikatuak prentsaurrekoa eskaini du gaur Laudion, eskualdeko hainbat sektoreko ordezkariren partaidetzarekin. Langile antolakundeak iragarri du mobilizatzeari ekingo diotela. Zehazki, ostiral honetan auto karabana egingo dute; eta hurrengoan, azaroaren 27an, manifestazioa, biak 18:00etan eta "Aiaraldeko etorkizunaren alde!" lemapean.
Mobilizazioen xedea izango da "klase politikoaren inplikazioa errealagoa izatea, eta propaganda gutxiagokoa". Izan ere, urriaren 22an Eusko Jaurlaritzak aho batez onartu zuen Aiaraldeko egoera sozioekonomikoa suspertzeko ekimena.
Sindikatuaren aldarrikapenak
LAB sindikatuak, Ieltxu Oruetaren bitartez, azaldu du itxaropena dutela egungo egoera aldatzeko, baina azpimarratu du ezinbestekoa izango dela kaleak hartzea alderdiak eta erakunde publikoak sakatzeko.
Halaber, LABek argitu du oraindik ez dutela gonbidapena jaso egitasmoan parte hartzeko. Behin jasota, euren proposamenak aurkeztuko dituzte. Momentuz, aurreratu dute inbertsio ugari behar direla, "gutxienez, garraio publikoan".
Aiaraldea, maldan behera ekonomikoki
Ildo beretik, langile antolakundeak gogoratu du orain eskualdeak bizi duen gainbehera sozioekonomikoa ez dela COVID-19aren emaitza izan, baizik eta joera baten ondorioa, zeinean enpresak desagertu diren, lan baldintzak okertu eta kaleratzeko mehatxuak dauden. Horien eredutzat jo dituzte Tubacex eta Tubos Reunidos konpainien kasuak.
Hori guztia irudikatzeko, 2020ko iraileko datuak aipatu dituzte: Euskal Autonomia Erkidegoan langabezia tasa %10,3koa den bitartean, Amurrion %15,4koa zen, eta Laudion %14koa. Amurrio, Artziniega, Arakaldo, Aiara, Orozko, Okondon, Laudio eta Urduñako langabeen kopurua, guztira, 2.685 lagunekoa izan da.
LABek azpimarratu duenez, horren guztiaren ondorioz, ehunka gazte joan dira Aiaraldetik kanpo bizitzera, lanpostu baten bila.