Mobilizazioa egin du LABek gaur arratsaldean Laudion. Modu horretan eman dio sindikatuak amaiera “Aiaraldeko etorkizunaren alde” borrokatzeko abiatutako ekimen sortari. Iragan astean kotxe karabana egin zuten eskualdean barrena:
Gaurko mobilizazioan, aldiz, Laudioko kaleak zeharkatu dituzte. Ehundik gora herritarrek egin dute bat manifestazioarekin.
Aldarri ugari
Eskualdea “alarma gorrian” dagoela ohartarazi dute sindikatuko kideek Herriko plazan eginiko ekitaldian, “enpleguaren suntsipena eta lan-baldintzen eta soldaten jaitsieren mehatxua kezkagarriak direlako”.
Aipamen berezia egin diete une honetan gatazketan murgilduta dauden enpresei: Tubos Reunidos, Tubacex, Valvospain... Osasun publikoko langileen eta ostalari zein merkatarien egoerak ere salatu dituzte, eta eskualdeko “hainbat enpresa txiki eta autonomo pairatzen ari diren egoerak”. LABen aburuz, argi dago enpresari batzuk COVID-19aren pandemia baliatu nahi dutela lana prekarizatzeko, “baina eskualdeko langileon egoera hau ez da koronabirusak sortutako osasun-krisiaren ondorio soilik. Denok dakigunez, hau atzerago doan kontua da”, ohartarazi dute, “azken hamarkadetan eskualdean bizi dugun egoera areagotu eta okertu du pandemiak”.
Eusko Jaurlaritzan Aiaraldeari buruz lantzen ari diren ponentzia sozioekonomikoa ere izan dute hizpide: “Espero dugu ekimen hori martxan jarrita klase politikoaren inplikazioa errealagoa izatea, eta ez horren propagandistikoa”.
Horren guztiaren aurrean, datozen hilabeteetan borrokan jarraitzeko deia luzatu dute LABeko kideek.