Bilboko Okupazio Bulegoko kideek urteak daramatzate aholkularitza eta babesa eskaintzen eraikin hutsak okupatu dituzten eragile eta norbanakoei. Aurten Aiaraldeko kasu bat izan dute esku artean, eta ezohiko egoera batekin egin dute topo. “Bost pertsona sartu ziren Arespalditzan dagoen eraikin zahar batean bizitzera. Eraikina garbitu eta konpondu zuten, hamar urte zeramatzan hutsik gutxienez”, azaldu du Iñaki Carrok, bulegoko abokatuak. Handik gutxira iritsi zen jabearen salaketa. “Iazko abenduaren 30an iritsi zitzaien demanda, eta gurekin jarri ziren harremanetan. Urtarrilaren 2an doako justizia eskatu genuen Amurrioko epaitegian”.
Orduan gertatu zen lehen “gauza arraroa”, Carroren esanetan: “Doako justizia eskatu genuenean bertan behera geratzen dira epeak orduan, hilabete batez. Baina hilabete bat baino gutxiago igaro zenean epaileak tramiteak altxatu zituen, eta epeak iraungitzen hasi ziren, gu ezer jakin gabe”.
Gauzak hala, maiatzean, “konfinamendutik ateratzean”, epaiarekin topatu ziren, abokatuak salatu duenez. “Idatzita zegoen dagoeneko epaia, guk dena geldituta zegoela uste genuen, eta ekainean desalojo agindua jaso genuen”.
Amurrioko epaileak hainbat prozedura urratu dituela salatu du Iñaki Carro abokatuak, okupazio baten harira
Helegitea
Helegitea aurkeztu zuten orduan, uztailaren amaieran, “defentsarako eskubidea urratu egin zela argudiatuta”. Orduan egin zuen epaileak “bigarren gauza arraroa”, Carroren ustetan: “sententzia behin behinean aplikatzea erabaki zuen helegitea aurkeztu eta hiru egunera. Hiru egun eman zizkien etxebizitzan zeuden pertsonei eraikina husteko, baina bostak kanpoan zeuden, lanean. Batzuk ezin izan zituzten euren gauzak ere hartu”.
Arrazoiak
Helegitea ere kendu zuten azkenean. “Baliteke auzitegi probintzialak helegiteari arrazoia ematea, baina jada kalean daude bost pertsonak”.
Gertatu denaren inguruko susmoak ditu abokatuak: “Nire susmoa da etxearen jabea nahiko ezaguna dela Amurrion, eta epailea ere herrikoa izanda... ez dago beste azalpenik. Bilbon ez zait inoiz halakorik gertatu, bi urraketa hain argiak jarraian... eta urtean 12-15 kasu inguru kudeatzen ditut”. Defentsarako eskubidea aldarrikatu du okupazio bulegoko kideak: “Egia da 'okupak' direla, baina badaude jarraitu beharreko prozedurak, jende guztiak du defentsarako eskubidea, bestela 'oihaneko legea' gailenduko da, eta abokatu bezala ezin dut hori onartu”.
Carroren ustez, gertakariak “erabat” apurtzen du legeak “okupak” babesten dituenaren "mitoa". “Badaude kasu batzuk luzatu ahal izan ditugunak, Auzitegi Goreneraino iritsi garelako, argudioak ditugulako, argudiorik gabe ezin da asko luzatu. Badaude pare bat urtez luzatzen diren auziak, baina normalean hilabeteko kontuak dira”.
Gauzak hala, duela urtebete bezala dago Arespalditzako etxe hori orain: hutsik. “Etxea hutsik zegoen eta hutsik jarraitzen du. Jabeek ez dute etxea erabiltzen, ez dute alokatzen... eta hor geratuko da beste hamar urtez itxita. Hori egiteko eskubiderik ere ez dago”.
