Helegitea aurkeztu dute EH Bilduko kideek Kantauriko Urkidetza ur-patzuergoan, iragan abenduaren 10eko batzar orokorrean partzuergoa desegiteko hartutako erabakiaren aurrean. EH Bilduren iritziz, ez ziren beharrezko izapideak bete eta, ondorioz, hartutako erabakia "erabat baliogabea da".
Txosten juridiko bat oinarri hartuta, abenduko batzar orokorrean hartutako erabaki guztiak bertan behera uztea eskatu dute, erakundearen desegiteak ekar ditzakeen ondorioak direla eta.
Kantauriko Urkidetzaren desegitea eta Arabako Foru Aldundiak sustatutako Urbide partzuergora aldatzea "eskubide gehiegikeria, lege-iruzurra eta boterearen desbideratzea" dela adierazi du koalizio abertzaleak, desegitea justifikatzen duen arrazoirik ez dagoela gaineratuta.
"Defentsa-gabezia handia" eragin die gertatutakoak patzuergoa osatzen duten entitateei, EH Bilduren aburuz. Izan ere, disoluzioaren gaineko erabakia hilabeteko epean hartzera behartuak izan dira erakundeak, informazio nahikorik izan gabe eta alternatibak aztertzeko aukerarik gabe.
Gauzak hala, ur-partzuergoko lehendakaria eta kudeatzailea beraien eginkizunetatik harago joan direla uste du koalizioak, eta tokiko autonomiaren printzipioa urratu dela gaineratu du.
