Tubacexeko ELAko sail sindikalak oharra plazaratu du zuzendaritzaren asmoen gaineko balorazioa egiteko. Atzo iragarri zuten enpresako buruek Enplegua Erregulatzeko Espedientea eta Aldi Baterako Enplegu Erregulazioko Espediente berria aurkeztu nahi dituztela. Bi espedienteen aurka posizionatu da sindikatua, eta nabarmendu du enpresak gaur egun duen egoera ez dela langile kopuruagatik edota lan baldintzengatik sortu. “Garrantzitsua iruditzen zaigu azpimarratzea enpresak irabazi handiak izan dituela 2019. urtera arte”.
ELAren ustez, zuzendaritzak porrot egin du produktuen dibertsifikazioan, eta horren erantzukizuna langileen gain jarri nahi izan du. Horrez gain, enplegu murrizketa jada ezarri dela gaineratu du sindikatuak: “Une honetan Aiaraldeko lantegietan iaz baino 150 lanpostu gutxiago daude, enpresa aldi baterako langileak alboratu dituelako. Azpikontratatutako enpresetan ere suntsitu da enplegua 2020an”. Gauzak hala, enpresaren asmoen aurkako erantzuna “indartsua” izan behar dela uste du ELAk: “Borroka izango da gure lanpostuak eta lan baldintzak defendatzeko bidea”.
“Euskal instituzioek” duten erantzukizuna ere aipatu du sindikatuak, eta honakoa eskatu du: Europatik etorriko diren funtsak jasoko dituzten enpresek “enplegua mantentzeko konpromisoa” hartzea. “Tubacexen eta Aiaraldeko industriaren etorkizunak Gasteizko gobernuaren posizionamendu indartsu bat eskatzen dute. Enpleguaren eta lan baldintzen defentsa izan behar da bere ardatz nagusia”.