Kaleratze kolektiboa ezartzeko asmoa du Tubacexek, "arrazoi objektiboak" argudiatuta. Hala jakinarazi dio enpresa taldeko zuzendaritzak Enpresa Batzordeari. Enplegua Erregulatzeko Iraungitze Espedientea aurkeztu nahi du horretarako multinazionalak, eta Aldi Baterako Enplegu Erregulazioko Espediente berria ere ezarri nahi du. Espediente horrek lekukoa hartuko lioke orain indarrean dagoenari, otsailaren 7an -datorren igandean- amaitzen baita.
Astelehenetik aurrera indarrean
Jakinarazpen baten bidez eman die zuzendaritzak sindikatuei bere asmoen berri. Dokumentu horretan ez du neurri horien gaineko informazio gehiago ematen. Bi espedienteen gaineko dokumentazio guztia osatzen ari direla aipatu du enpresak, eta datorren astelehenerako -otsailak 8- prest izatea aurreikusi dute, egun horretan sartuko baitira bi neurriak indarrean. Orduan ekingo dituzte negoziaketak. Horretarako, bilera batera bertaratzeko deia luzatu diete sindikatuei, arratsalde horretan bertan.
Tubacexeko akzioek, gora
Tubacexek hartutako erabakiak bat egin du denboran enpresaren akzioen gorakadarekin. Telegram talde batean zabaldutako tesi ekonomiko batek multinazionalaren akzioak erostera bultzatu ditu zenbait inbertitzaile. Antza, talde horretan 6.000 pertsona inguru daude eta administratzaileak hainbat komentario positibo egin ditu enpresaren alde apustu egitera bultzatzeko. ElDiario.es hedabidearen arabera, honakoa da esan duen gauzetako bat: "Krisiaren kontu honekin guraizea sartzen ari dira, txarra langileentzat eta ona akziodunentzat".
Bloomberg-en datuen arabera, goizean zehar enpresa-taldearen 650.000 titulu baino gehiago salerosi dira. Horren eraginez, akzioen prezioa %8 igo da, aurreko asteetako bataz bestekoak gaindituz.
Gertatutakoa Wall Street Betsen fenomenoarekin erlazionatu da, baina ez da egoera berdina. GameStop enpresaren kasuan, inbertitzaileek akzioek balioa galtzearen alde egin zuten apustu, Tubacexen kasuan ez bezala. Hala ere, Balore Merkatuaren Espainiako Batzordeak iragan astean ohartarazi zuen enpresa baten akzioak “maila artifizialetan” kokatzea delitua dela.
Datorren astelehenean sartuko dira indarrean espedienteak formalki, eta orduan bildu nahi du zuzendaritzak sindikatuekin, negoziaketak hasteko
150 soldata aurreztea
Uda hasieran jakinarazi zuen Tubacexeko zuzendaritzak 150 langileren soldata aurreztu nahi zuela. Orduan hasi ziren enpresaren eta sindikatuen arteko negoziaketak, baina ez zuten ezer adosterik izan.
Ordutik hona mobilizazio jendetsu andana egon da eskualdean, baina horrek ez ditu zuzendaritzaren asmoak aldatu. Enpresak urte amaieran iragarri zuen 13 milioi euro galdu egin zituela, eta langileak kaleratzeko beharra jarri zuen berriz mahai gainean. Baina, era berean, aitortu zuen 236,9 milioi euroko likidezia duela eta, ondorioz, kutxan diru nahikoa dutela 2024ra arte heltzen diren maileguak ordaintzeko.
Aldi baterako hirugarren espedientea jarraian
Aldi Baterako bi Enplegu Erregulazioko Espediente jarri ditu indarrean Tubacexeko zuzendaritzak pandemia hasi zenetik. Lehena maiatzean abiatu zen eta azarora arte iraun zuen, eta orduan ezarri zuten oraingoa, langileekin inolako akordiorik lortu gabe.
Bigarren espedientea negoziatzeko bilerak tentsio handikoak izan ziren. Bilera horietan enpresak aitortu zuen hilero 700.000 euro aurreztu dituela espedienteari esker. Hau da, zifra hori aintzat hartuta, maiatzetik hona enpresak 4 milioi euro baino gehiago aurreztu dituela ondorioztatu daiteke.
Mobilizazio ziklo indartsua
Langileen Batzordeak, bere aldetik, mobilizazio ziklo indartsua burutu zuen. Beharginez gain, ehunka bizilagun batu izan dira irailetik hona eginiko ekimenetara.
Hemen beheko bideo-bilduma honetan ikusi daitezke ekimen esanguratsuenak: