Oharra plazaratu du LABek Tubacexeko zuzendaritzak kaleratze kolektiboa abiatzeko dituen asmoen aurrean. Sindikatuko kideek adierazi dute albistea ez dela ezustekoa izan, baina “sumindu” egin dituela. “Sistema kapitalistak Tubacex bezalako enpresei enplegua suntsitzeko aukera ematen die erakundeak kapitalarentzat lanean ari direla, administrazio-kontseilu baten diru-goseagatik”.
Nabarmendu dutenez, multinazionalaren zuzendaritzak “diru bera edo gehiago” irabaziko du aurrerantzean, “langileen kontura”. “Beraz, argi eta garbi esan behar da inposatu nahi dituzten kaleratzeak eta prekarietatea ez direla enpresaren biziraupena eta enplegua bermatzeko”.
Aldi Baterako Enplegu Erregulazioko Espediente berriarekin, ordea, “denbora irabazi” nahi du enpresak, LABen ustez. “Horretarako, zalantzarik gabe, bere langileen langabezia eta diru publikoa erabili ditu bere estrategia finantzatzeko”.
Gauzak hala, orain arteko aldarri berei eutsi die sindikatuak: Tubacexeko langileek enpleguaren defentsan hasiko duten borroka babestu eta bultzatzea. “Era berean, erantzun eta borroka hori eskualdeko sektore guztietatik etor dadin lan egingo dugu, Tubacexeko lanpostuen etorkizuna ez ezik, Aiaraldeko enpleguaren eta ekonomiaren etorkizuna ere jokoan baitago”.