Claudia Venceslao EH Bilduko batzarkideak, Asasam elkartearen egoera eraman zuen iragan otsailaren 3an Arabako Batzar Nagusietara. Urteak dira intentsitate handiko bizitoki baten proiektua garatzeko zain daudela buru osasuna duten pertsonen eta senideen Aiarako elkarteko kideak.
Ibilbide luzea
Venceslaok bizitoki proiektuaren ibilbidearen birpasa egin zuen: "Gaur, berriz ere, ahaztuta geratu diren promesa elektoralak ekarri nahi ditugu kamara honetara". 2017an onartu zen buru gaixotasuna duten pertsonentzako bizitoki-baliabideak garatzeko mozioa Arabako Batzar Nagusietan, proiektuari bide emanez; eta 2018an iragarri zen 6 lagunentzako intentsitate handiko bizitokia. Proiektua, gainera Asasamek kudeatuko zuen, zehaztu zenez. "Urte luzeen ostean elkarteak bere eskakizunak egi bihurtuta ikus zitzakeen" azpimarratu du Claudioa Venceslaok.
2019an, Udal eta Foru hauteskundeen aurretik, Ramiro Gonzalez Ahaldun Nagusiak Radio Llodion egindako elkarrizketa batean higiezinaren kokalekua zehaztea bakarrik falta zela adierazi zuen, bizitokia Laudion egongo zela ziurtatuz. Hauteskundeak igarota, Emilio Sola Ongizate Diputatu berriarekin elkartu ziren Asasameko kideak, eta honek proiektuaren berri ez zuela azaldu zien. “Gaiari buruz bere harridura eta erabateko ezjakintasuna adierazi zigun, eta beste behin, babesik gabe eta erabiliak sentitu ginen” aitortu zuten orduan ASASAMeko kideek.
Hauteskundeak igarota, Emilio Sola Ongizate Diputatu berriarekin elkartu ziren Asasameko kideak, eta honek proiektuaren berri ez zuela azaldu zien
"2021ean 2017ko mozioaren exekuzioaren zain dago oraindik Asasam", adierazi du Claudia Venceslaok. "Oso tristea da kolektibo zaurgarri batekin hauteskunde propaganda egitea. Ezerk ez du arduragabekeria hau justifikazten", leporatu dio EH Bilduko batzarkideak Foru Gobernuari.
Mobilizazioak Gasteizen
Udan elkarretaratzea egin zuen Asasam elkarteak, Batzar Nagusien aurrean, bizitoki proiektua gauzatzea eskatzeko. Bertan, COVID-19aren ondorioz ezarritako alarma egoerak azpiegitura horren beharra “are nabarmenagoa” egin duela salatu zuten.
12 urte baino gehiago daramatza elkarteak espazioaren beharra aldarrikatzen, eta "promesa itxaropentsuak" jaso izan dituzten arren ezerezean geratu direla berretsi dute.