1.873.000 euro jaso zituzten guztira kontseilari exekutiboak ez diren Tubacexeko goi-karguek 2020. urtean, soldatetan. Hala jasotzen du multinazionalak Merkatuaren eta Lehiaren Espainiako Batzordera (CNMC) helarazitako txostenak.
11 goi-kargu dira guztira, eta Celestino Danis da horietako bat. Aiaraldeko lantegietako gerentea da Danis, eta langileek, bere aldetik, kaleratzeen erantzule zuzen gisa identifikatu dute (bera da Enpresa Batzordearekin azken asteetan eginiko bileretara joan dena, besteak beste).
Hauek dira txostenean agertzen diren 11 goi-karguak:
Celestino Danis Basurko
Kargua: Managing Director Steel&Extrusion
Manuel Sarabia Figueroa
Kargua: HR Corporate Director and MD Trading and Services
Anton Azlor Villa
Kargua: Commercial Corporate Director
Iker Azkargorta Viteri
Kargua: Managing Director Big Pipes&Fittings
Juan Ignacio Roscales Bengoechea
Kargua: Purchasing Corporate Managing Director
Diego Herrero de la Torre
Kargua: Innovation Corporate Managing Director
Guillermo Ruiz-Longarte Perez
Kargua: Chief Corporate Officer
Charles Kirby Isasi
Kargua: Supply Chain Corporate Director
Javier Lorenzo Santiago
Kargua: Managing Director Americas
Miguel Gomez Lacabex
Kargua: Oim and M&A Director
Ajay Sambrani
Kargua: Asia&Middle East Managing Director
Dokumentuak ez du zehazten pertsona bakoitzak zenbat diru jaso duen, baina dirua modu proportzionalean banatuko balitz bakoitzak urtebetean 170.272 euro jaso dituela ondorioztatu ahalko litzateke.
Tubacexeko goi-karguek multinazionaleko administrazio kontseiluko kideek baino diru gehiago jaso zuten iaz. Bitxia dirudi hori, baina ohikoa da. Vidralan eta Tubos Reunidosen ere berdina gertatzen da, adibidez.
Kontuan hartu behar da administrazio kontseiluko kide askok beste lan edo kargu batzuk ere badituztela, beste enpresa edo erakundetan. Gainera, kontseiluko zenbait kide enpresaren akziodunak ere badira, eta modu horretan ere dirua jasotzen dute, dibidenduak banatzen direnean. 2019an 6 milioi euro banatu ziren guztira Tubacexeko akziodunen artean.
Azken hamarkadako bilakaera
2019an are diru gehiago irabazi zuten Danisek eta gainontzeko 10 karguek: 2.755.000 euro guztira. 250.454,54 euro izango lirateke kontseilari bakoitzarentzat dirua 11 zati proportzionaletan banatuko balitz.
2011. urtean sartu zen Tubacexen Celestino Danis. Geroztik 25.236.000 euro banatu dituzte esparru horretan, eta hau da ordutik hona goi-karguen soldatek izan duten bilakaera:
- 2011. urtea: 2.796.000 euro 13 kideren artean
- 2012. urtea: 3.157.000 euro 14 kideren artean
- 2013. urtea: 2.909.000 euro 13 kideren artean
- 2014. urtea: 2.277.000 euro 9 kideren artean
- 2015. urtea: 2.277.000 euro 11 kideren artean
- 2016. urtea: 2.188.000 euro 11 kideren artean
- 2017. urtea: 2.349.000 euro 12 kideren artean
- 2018. urtea: 2.655.000 euro 9 kideren artean
- 2019. urtea: 2.755.000 euro 11 kideren artean
- 2020. urtea: 1.873.000 euro 11 kideren artean
