Oharra plazaratu du LAB sindikatuak Ertzaintza Tubacexeko greba mugagabean izaten ari den "neurrigabeko" jokabidea salatzeko. Atzo -martxoak 25- ez ezik, grebaren aurreko 42 egunetan ere langileek poliziaren probokazioak jasan dituztela adierazi du sindikatuak. "Tamalez, 43 greba egun hauetan hainbat ekintza probokatzaile eta neurriz kanpokoak izan dira Ertzaintzako hainbat kideren eskutik, bai eta dispositibo osoen eskutik ere".
Ertzaintzak zenbait kazetariren jarduna oztopatu duela nabarmendu dute sindikatu abertzaleko kideek, bai eta ordezkari sindikalen aurka egin duela ere. LABen iritziz, jokabide zalantzagarria da Ertzaintzarena: "Ertzaintzako zenbait kide jarrera 'txuleskoak' eta agintekeriazko jarrerak izaten ari dira langileen aurka, etengabe zirikatzen eta kikiltzen saiatzen baitira".
Foam balak
Atzoko karga polizialetan foam balak erabili zituen Ertzaintzak grebalarien aurka. Karga polizialen ondorioz langile ugari zauritu ziren eta hainbatek anbulatoriora jo behar izan zuten. LABek gogor kritikatu du Ertzaintzak langileengana eskopetarekin apuntatzea.
Azkenik, grebalariak errespetatzea eskatu dute: "Tubacexeko langileek dagokien errespetuarekin tratatzea merezi dute, beren lanpostuak eta beren familien eta eskualdearen etorkizuna defendatzen ari baitira, Tubacexeko enpresa-zuzendaritzaren diru- gosearen aurrean".
