Aiara Biraren XXXI. edizioa itxi zuten iragan larunbat eta igandean jokatutako Arespalditza eta Amurrioko lasterketek. Aurtengo edizioa Espainiar Txirrindularitza Federazioko egutegi ofizialaren parte izan da, eta guztira 180 txirrindulari gaztek osatu dute tropela.
Araba, Bizkaia, Gipuzkoa eta Nafarroako txirrindulariaz gain, Espainiako Estatutik etorritako kirolari ugarik hartu dute parte proban. Gainera, ehundik gora boluntario aritu dira biraren antolakuntza lanetan.
Arespalditza: etapa nagusia
Bere gogortasunagatik larunbatekoa izan da bost jardunaldietatik esanguratsuena. Arespalditzatik abiatu ziren txirrindulari gazteak. Tropela batuta iritsi zen Beotegiko gainaren oinetara. 1. kategoriako mendate horretan ordea, zatitu egin zen eta ordutik aurrera abiadura bizia hartu zuen lasterketak. Miguel Dominguez izan zen helmuga zeharkatzen azkarrena.
Amurrio: guztia erabakitzeke
Lehia estuarekin heldu ziren sailkapen nagusiko buruak Amurrion jokatuko zen azken jardunaldira. Lehenengo hiru txirrindularien atzetik beste 14 zihoazen, 2 segundoko aldearekin.
Aiara Txirrindulari Elkarteko Tamirat Navarro gazteak ihesaldia egin zuen, baina tropelak helmugatik 5 kilometro eskasera harrapatu zuen.
Etapa Alberto Galindorentzat izan zen, eta sailkapen nagusian Norinver taldeko Sergio Romeo igo zen podiumeko maila gorenera. Jon Unzaga txirrindulari profesional ohia arduratu zen sari banaketaz.
Antolakuntzak oso balorazio positiboa egin du: "COVID-19ak jarritako zailtasun guztiak gainditu eta oso lasterketa polita izan da aurtengo Aiara Bira".