Aurretiazko ekinbideak ireki dizkiete otsailaren 23ko goizean Tubacexen egondako piketean atxilotutako bi langileei. Desordena publikoak eta autoritateari atentatua egitea egotzi diete, eta horregatik ikertuko ditu Amurrioko epaitegiak. Gauzak hala, zitazioa bidali die epaileak bi beharginei.
Kamiseta antifaxista
Atxilotutako langileetako batek Aiaraldea Hedabideari ziurtatu dio berak ez zuela istiluetan parte hartu. Alegia, istiluak bere atxiloketa izan ostean gertatu zirela. "Bideoak daude hori erakusteko, baina ez dakit epaileak onartuko dituen", aipatu dio komunikabideari.
Horrez gain, azpimarratu du egun horretan ikur antifaxistadun kamiseta bat eta musukoa eramaten zituela soinean. Horregatik, beharginak susmatzen du “itxuragatik” atxilotu zutela.
Izan ere, senide bat komisaldegira bere bila joan zenean, polizia batek iradoki zion bera “lantegira istiluak eragitera kanpotik joandako gazte bat” zela. Ahaideak berak argitu zion poliziari atxilotutakoa Tubacexeko langilea zela.
Otsailaren 23ko gertaerak
Otsailaren 23ko goizean istiluak egon ziren Tubacexen Laudioko lantegiaren aurrean. Langileak errepidean eseri ziren eta Ertzaintzak hainbat aldiz kargatu zuen zuzendaritzaren autobusari sarbidea bermatzeko:
Sindikatu polizialek gogor kritikatu zuten gertatutakoa, dozena bat polizia baino gehiago zauritu zirela nabarmenduta.
Beharginek, euren aldetik, salatu egin zuten Ertzaintzak hainbat pertsona zauritu zituela borrekin, eta zaurien argazkiak zabalduta.