EH Bilduk mozioa aurkeztu du Arabako Batzar Nagusietan, mendietako jabeekin eta gainerako erakundeekin batera eukaliptoaren hedapenari aurre egiteko neurriak abian jartzea eskatuz. Eskualdeko egoera bereziki kezkagarria dela adierazi dute EH Bilduko kideek. "Aiaraldean bakarrik bikoiztu egin dira landatutako eukalipto hektareak", adierazi du Kike Fernandez de Pinedo bozeramaileak.
Hamar urteko epean eukalipto landaketen gorakada nabarmena bizi izan du Aiaraldeak. 2020. urtean 1.798 hektarea ziren zuhaitz honek eskualdean okupatzen zituenak.
EH Bilduk baso-plan iraunkor berri baten aldeko apustua egin du, "espezie autoktonoen eta hostozabalen landaketak sustatzeko, ingurumen-bioaniztasun handiagoko prozesu ekologikoak sortzeko eta lurzoruen higadura murrizteko" helburuarekin.
Espezie inbaditzailea
Eusko Jaurlaritzari ere eskaera luzatu dio talde politikoak: eukaliptoa Espezie Exotiko Inbaditzaileen Euskal Katalogoan sartzea eskatu dute. Neurri horrek eukalipto gehiagoren landaketa galaraziko luke.
"Erakunde eta administrazio bakar bat ere ezin da bazterrean geratu: ikerketa zientifikoen arabera, espezie hori kaltegarria da bioaniztasunarentzat, baso-ekosistementzat eta ibaiak edo lurpeko uren tankerako ur-baliabideentzat", azaldu du Fernadez de Pinedok.