Irailaren 1etik aurrera zabalduko dute AP-68 autobideko hobarien programa Laudio eta Bilbo artera. Tarte horretan ohikoan aritzen diren gidariek %60ko hobaria izango dute ordainsarian.
Gaur iragarri du Arabako Foru Aldundiak neurri hori. Herritarrek “diru asko aurreztu” ahalko dutela nabarmendu du Blanca de la Peñak.
Bide Azpiegituren eta Mugikortasunaren Saileko foru diputatuaren esanetan, urtean 554 euro aurreztuko dituzte lanera edo ikastera Laudiotik Bilbora joateko egunero autobidea erabiltzen dutenek. “Gasteiz eta Bilbo artean egunero bidaiatzen duen eta egungo baldintzetan programaren onuradun den pertsona batek urtean 1.496 euro behar ditu bidesariak ordaintzeko, baina aldaketak egin eta gero, 994 euro ordainduko ditu”, azaldu du De la Peñak, “aldiz, Laudio eta Bilbo artean bidaiatzen duen herritar batek urtean 924 euro ordaintzen ditu, ezin baitu inolako hobaririk jaso. Dekretu berriari esker, aldiz, urtean 369 euro ordainduko ditu”.
Aldundiko ordezkariak azaldu duenez, orain arte Zanbrana eta Laudio artean zihoazen gidariek soilik jasotzen zuten hobaria. Irailetik aurrera, ordea, EAEtik igarotzen den AP-68ko tarte osoak izango du hobaria.
Hobaria jasotzeko baldintzak hiru izango dira, orain arte bezala:
- Hilean gutxienez 15 bidaia egitea.
- Araban erroldatuta egotea.
- Teleordainketa sistema bat izatea.
AP-68 dohainik plataformaren balorazioa
AP-68 dohainik plataformako kideentzat “albiste ona” izan da Aldundiak iragarritakoa, baina euren aldarrietatik “oso urrun” dagoela gaineratu dute, autobidea erabat doan izatea aldarrikatzen dutelako.
Aldundiak, bere aldetik gogorarazi du Batzar Nagusietan aztertzen ari direla nola finantzatu modu egokian “Arabako gaitasun handiko bideen mantentzea”, eta hobarien programa hausnarketa horren parte dela. “Lan horren ondorioen arabera erabakiko da AP-68 eta AP-1 autobideetarako hobarien egungo programen etorkizuna”.
