Plataforma aurkeztu berri duzue. Zein helbururekin?
Aiaran jaio da eragilea, baina Urduñatik Arrigorriagarainoko herrietara iritsi nahi dugu. Lanbideren arabera, Laudio eta Orozkotik 13.000 bizkaitar doaz Arabara lanera egunero, eta 9.000 arabar Bizkaiara doaz. Plataforma zerbitzu publikoa izateko helburuarekin jaio da, alderdikerietatik kanpo.
Erabiltzaileen gastua, errepidearena, eta kutsadura neurtu dituzue. Zeintzuk dira ondorioak?
Laudiotik Gasteizera 10 aldiz joateak 37.50€ balio du, eta 15 bidaia egiteak 30€ (%60ko deskontua aplikatzen da bidaia kopuru horretatik aurrera eta). Aldiz, Bizkaiara mugitzeko ez dago hobaririk. Eskualdetik jendetza mugitzen da Bilbora edota Gasteizera lanera, garraio publikoa oso murritza da eta gure hiriburura (Gasteizera) joateko asko ordaindu behar dugu.
Ingurumen kalteei dagokienez, Bilbotik Laudiorako tartean 5.06kg /CO2 kutsatzen da, errepide nagusian 6.78 kg kaltetzen den bitartean. Denbora gutxiago behar izatea, kutsadura txikitzea eta segurtasuna handitzea eragingo lituzke bidesari ezak.
Diskriminizazioa salatzen duzue. Zergatik?
AP-68ko Laudio-Bilbo tartea Espainiar estatuko errepide sarearen laugarren zatirik garestiena da. 2.10€ balio dute 10 kilometrok (Aretatik 10 kilometro daude, eta Laudiotik 12 km). Seopan Autopisten Patronalaren arabera, 0.09 eurotan kilometroa errentagarria da; beraz, bikoitza baino gehiago ordaintzen dugu (Aretatik Bilbora, 0.21€ dira kilometroa).
Azken 9 urteetan (20211tik 2020ra) Laudion autopista egunero hartzen dutenek ez dagozkien 8.700€ ordaindu dituzte, eta 2026 arte luzatzen bada egoera 4.250€ gehiago izango dira: guztira ia 13.000€. Gasteizera doazen hobaridunek 795 euroko gastua dute urtero, 7.100€ ordaindu dituzte iaz arte, eta egoera aldatu ezik ia 12.000€ utziko dituzte errepide horretan.
Instituzioen babesa bilatu edo jaso duzue?
Plataformaren jardute eremua Urduñatik Arrigorriagarainokoa da. Aiara eta Artziniegakoekin ere bildu nahi dugu. Momentuz Urduña, Laudio, Amurrio eta Orozkoko alkateekin elkartu gara. Ugao, Arakaldo, Arrankudiaga eta Arrigorriagakoekin ere hitz egin dugu, baita Batzar Nagusietako EH Bilduko biltzarkideekin ere. Aste honetan Podemos eta PPkoekin jarri dugu zita.
Plataforma gisa, zeintzuk dira zuen asmoak?
Orain arte dokumentazioa prestatzen ibili gara. Udalekin, Batzar Nagusietako kideekin eta sindikatuetako ordezkariekin elkartzen gabiltza orain, eta askoren babesa jaso dugu jada: ELA, LAB, UGT, STEILAS, EHNE, SATSE, EUSPEL... Oraingoz babes sindikal gehiago jasotzen ari gara politikoa baino.
Aurrera begira, plataforma publikoki aurkeztea, sare sozialak zabaltzea, eta auto karabanak antolatzea izango dira gure hurrrengo pausoak, doakotasuna eskatzeko.
