Osakidetzak plazaratu berri du txostena asteburuko datuekin, COVID-19 birusari dagokionez. 9 positibo gehiago atzeman ditu osasun sistema publikoak Amurrion, Laudion, Aiaran eta Orozkon.
Kopurua errepikatu da. Izan ere, pasa den asteburuko bera izan da eta datu hobeak topatzeko otsailera arte joan beharra dago. Otsaileko azkenaurreko asteburuan 8 kasu berri agertu ziren. Geroztik, beti gainditu da zenbaketa hori eta unerik okerrena apirileko azken asteburua izan zen, zeinean 52 kutsatu berri azaleratu zituzten.
Intzidentzia metatuaren tasari dagokionez, udalerri gehienek eutsi diete euren kopuruei eta Amurriok nabarmen murriztea lortu du. Salbuespenak Laudio eta Orozko dira. Laudio gorako joera txikian dago, garrantzirik gabekoa. Alegia, 114,44an dago. Orozko, ordea, oraindik eremu gorriko langatik urrun badago ere, berriro egin du gora eta 228,05ean kokatu da.
| Udalerria | Ratioa | Osteguneko ratioa |
Aurreko eguneko ratioarekin alderatuta
|
| Amurrio | 77,44 | 116,17 | -38,73 |
| Artziniega | 0 | 0 | (=) |
| Aiara | 138,17 | 138,17 | (=) |
| Laudio | 114,44 | 103,4 | +11,04 |
| Okondo | 0 | 0 | (=) |
| Arakaldo | 0 | 0 | (=) |
| Arrankudiaga-Zollo | 98,23 | 98,23 | (=) |
| Orozko | 228,05 | 190,04 | +38,01 |
| Urduña | 47,25 | 47,25 | (=) |