Eguna modu gorabeheratsuan hasi du Renfek. Izan ere, 06:40ak aldera enpresa publikoak jakinarazi du Laudio eta Abando arteko zerbitzua eteten zela arazo teknikoen ondorioz. Zehazki, langile batek azaldu dio Aiaraldea Komunikabideari arazoa dela zirkuitu bat matxuratu dela eta semaforo bat gorri dagoela ibilbideko zati oso batean. Horrek suposatzen du gidariak motelago joan behar direla. Beharginak azpimarratu du horren ardura, zehazki, ADIF enpresarena dela.
#BilboAldiriak Gaur 17, Bilbao-Llodio eta Llodio-Bilbao-ren arteko trenak kendu dira abisu berria eman arte, arazo tekniko batengatik.
— InfoRenfe (@Inforenfe) June 17, 2021
Gero, Urduñara joan behar zen tren batek bere ibilbidea Amurrion bukatuko zuela iragarri dute.
#BilboAldiriak Gaur 17, 26510 6:50 Bilbao-Orduña trena bere bidaia Amurrio-n bukatuko du arazo tekniko batengatik.
— InfoRenfe (@Inforenfe) June 17, 2021
Azkenik, arazoa konpondu dutela zabaldu du Renfek, baina atzerapenek jarraitzen dute Aiaraldean eta Urduña eta Amurrio arteko trenak, erabiltzaileek azaldu dutenez, ez daude indarrean.
#BilboAldiriak Arazo teknikoa konpondu da, lineako trenak bere normaltasuna berreskuratuko dute pixkanaka, barka itzazue eragozpenak.https://t.co/JdhtTijefw
— InfoRenfe (@Inforenfe) June 17, 2021
Informazio gehiago izan ahala eguneratuko du Aiaraldea Hedabideak albistea.
Pandemia hasi zenetik, arazoak ohikoak bilakatu dira garraio publiko horretan eskualdeko bidaiarientzat.
Prekarietatea eta istripuak
Renfe eta ADIF enpresetan ordezkaritza duten sindikatuek ikasturte hasieran salatu zuten lan baldintzek nabarmen egin dutela okerrera azken urteotan eta prozesua azkartu eta sakondu dela COVID-19aren ondorioz.
Gauzak horrela, enpresa batzordeak azpimarratu du gero eta langile gutxiago daudela betebeharrei aurre egiteko eta mantenu zerbitzuan ere konponketa piezen falta aipatu zuten.
Azken horren adibide gordinak jazo dira eskualdean. Tren baten frenoak erre egin ziren Laudion, bi egunez balazta elektrikorik gabe egon eta gero. Gidariak eta ikuskatzaile batek kudeatu behar izan zuten ezbeharra, Gardeako geltokian trena hustu ostean. Azkenean Aiarako Suhiltzaileek esku hartu behar izan zuten: