Greba mugagabearen 160. egunean Tubacexeko zuzendaritzaren erantzuna jaso dute Tubacexeko langileek. Enpresa Batzordeko kideak premiazko bilera batera deitu ditu Eusko Jaurlaritzako Industria Sailak eta bertan jaso dute multinazionalaren proposamena.
Enplegua Erregulatzeko Espedientearen bidez kaleratuak izan ziren 129 langileek euren lanpostuetara bueltatzeko aukera izango dute, Justizia Auzitegi Nagusiko epaiak kaleratzeak baliogabetu ostean ezarri bezala.
Inkorporazioa era mailakatuan egin nahi du Tubacexek, uztailaren 26tik urriaren 30era. Berrartutako langile guztiak, gainerakoekin batera, irailetik aurrera abian jarriko den Aldi Baterako Enplegua Erregulatzeko Espedientearen barruan sartuko lirateke.
Enpresa Batzordeak hurrengo egunetan emango du proposamenaren gaineko balorazioa. Besteak beste, argitzeke dago oraindik multinazionalak Madrilgo Auzitegi Gorenean jarritako helegitea mantenduko duen edo ez.
ELAren balorazioa
Albistearen balorazioa egin du ELAk. Sindikatuak jakinarazi du "tentuz" aztertuko duela zuzendaritzak eginiko proposamena. "Baina, ez dugu zalantzarik: afiliatuek eta batzordeak grebari eusteko erakutsitako determinazioaren ondorioa da Tubacexen zein Eusko Jaurlaritzaren jarrera aldaketa".
LAB sindikatuaren balorazioa
Ildo beretik mintzatu da LAB sindikatua arratsaldeko lehen orduan plazaratutako oharrean. Lortutako emaitza "langilen eta eskualde oso baten irmotasunaren emaitza" dela uste dute sindikatuko kideek, eta nabarmendu du greba mugagabearekin eta mobilizazioekin jarraitzeko "apustu argiak" ahalbidetu duela garaipena. "Horrek erakutsi du borroka dela bide bakarra lanpostuak eta lan-baldintza duinak defendatzeko".
Hala ere, zuhurtziaz jokatzeko unea dela uste dute. "Ezin dugu ahaztu enpresak, gaur egun, errekurtsoarekin aurrera jarraitzeko asmoari eusten diola Espainiako Auzitegi Gorenean, eta, beraz, kaleratzeekin aurrera jarraitu nahi duela". Horregatik, berriz exijitu diote multinazionalari helegite hori kentzea, eta Eusko Jaurlaritzaren "bitartekaritza" eskatu dute horretarako.
ZUZENDARITZAREN ESKAINTZAK EZ DU BARNE HARTZEN ERREKURTSOA KENTZEA.
— LAB Tubacex-Acva. (@labtubacex) July 20, 2021
LABek Auzitegi Goreneko errekurtsoa kentzea eskatzen dugu funtsezko baldintza gisa. Lanera itzultzea eginda egon behar zen beraz, eskaintza osatugabetzat jotzen dugu.@aiaraldea @berria @naiz_info
Pozik, baina zuhurtziaz
Aiaraldea Hedabidea Laudioko piketera hurbildu da albistea jaso bezain pronto eta langileekin mintzatu da. Poztasuna adierazi badute ere, zuhurtzia izan da nagusi grebalarien artean.
Alde batetik, mesfidantza handia da Tubacexeko zuzendaritzari dagokionez. Bestetik, Enpresa Batzordearen balorazioa itxaroten ari dira, behin multinazionalaren proposamena bere osotasunean analizatu ostean.