Enplegua Aldi Baterako Erregulatzeko Espedientearen nondik norakoak negoziatzeko bigarren bilera burutu da gaur Tubacexeko zuzendaritzaren eta enpresa batzordearen artean. Bi aldeak Laudioko fabrikako bulegoetan elkartu dira, 11:00etan.
Abuztuaren 31an ospatu zen lehenengo bileran aurkeztu zituen multinazionalak espedientearen nondik norakoak: irailaren 11tik abenduaren 31ra luzatuko da, %70eko eragina izango du eta justiziaren aginduz berrartuak izan diren langileak ere sartuko dira honen eraginpean. Tubacexek, ordea, nahitaezko kaleratzeei eutsi nahi die, 129 beharginen etorkizuna Madrilgo Auzitegi Gorenean aurkeztutako helegitearen eskuetan utziz. Sindikatuen iritziz, ulergaitza da enpresaren jarrera hori.
Langileen ordezkariek mahaigainean dauden nahitaezko kaleratzeak albo batera utz ditzan eskatu diote Tubacexi, Auzitegi Goreneko helegitea erretiratuz
Gaurko bileran proposamen bateratua aurkeztu dio enpresa batzordeak zuzendaritzari. Mahaigainean dauden nahitaezko kaleratzeak albo batera utz ditzan eskatu diote Tubacexi, Auzitegi Goreneko helegitea erretiratuz. Horrez gain beste hainbat neurri ere proposatu dizkiote multinazionalari, hala nola, aurre-jubilazioen kolektiboa handitzea eta borondatezko bajei bidea zabalik uztea. Tubacexek ez azpikontratatzeko eta enplegua 2024ra arte mantentzeko konpromisoei eustea ere gehitu dituzte espedientea adosteko baldintzen artean.
Azkenik, langileek uko egingo liokete ere lan-hitzarmenean adostutako enplegua sortzeko konpromisoari; gaur gaurkoz oraindik aplikatu gabe dagoen arren.
Erantzunaren zain
Enpresa batzordeak datorren astelehenerako espero du multinazionalaren erantzuna. Egun horretan -irailak 6-, dago finkatuta bi aldeen arteko hirugarren bilera, 11:00etan Laudioko fabrikako bulegoetan.