Gaur eguerdian aurkeztu du Aiarako Kuadrillak Dugud plataforma birtuala. Erabilitako artikuluen bizitza luzatzeko balioko du tresna horrek, hondakinen kopurua murrizteko eta ekonomia zirkularra sustatzeko, eta nahi duenak izena eman dezake jadanik egitasmoan. Horretarako, posta helbide elektronikoa eta inprimakia bete baino ez da egin behar.
Dugud hitza ingeleseko "do good" (on egin) esaeratik sortu dute eta asmoa da jendeak bat egitea ekonomia zirkularrarekin eta hondakin kopurua murrizteko konpromisoarekin. Horrela azaldu du Encina Castresanak, kuadrillako presidenteak. Cespa enpresako bi ordezkari ere egon dira aurkezpenean, enpresa horrek kudeatzen baitu zerbitzua kuadrillan.
Baldintzak
Objektuak eskuratzeko puntu sistema baliatuko dute eta soilik izena emateagatik 100 puntu lortuko dira, eta beste 100 zerbait ematen den bakoitzean. Artikuluak jasotzean, ordea, 50 puntu galduko dira bakoitzeko.
Produktuen argazkiak eta ezaugarriak erabiltzaileek eurek argitaratuko dituzte, salbu webgunean erroldatzeko asmorik ez badute. Izan ere, kasu horietan Garbiguneko langileek egingo dute lan hori. Sei kategoriatan sailkatu dituzte gauzak: kirola eta aisia, haurrak, etxea, dekorazioa, brikolaje eta lorezaintza eta elektronika.
Halaber, 7 eguneko epea egongo da gauzak utzi zein hartzeko, Laudioko Garbiguneko berrerabilpen etxolan, hain zuzen. Herritar bakoitzak 4 artikuluren erreserba egin dezake, gehienez, aldi berean, eta 5ena, aldiz, hileko.
Ekimen gehiago
Plataformaren egistasmoa ez da isolatua, helburu bera duten truke kutxak jarri baitzituzten udan. Horrez gain, Aintzane Arbaizagoitia Ingurumen teknikariak azaldu du kuadrillako Gizarte Ongizateko langileek profil berezia izango dutela -objektuak eskuratzeko mugarik gabe-, udaletan agertzen diren premiazko beharrak asetzeko.