Arratsaldean iragarri bezala, Tubacexeko zuzendaritzak egindako proposamena ez dute onartu gaur enpresako sindikatuek. Berez, gehiengoaren babesa lortu du akordioak -hau da ELA eta CCOOrena-, baina CCOOk iritzi du hori ez dela nahikoa. Izan ere, enpresa batzordean ordezkaritza duten sindikatuen gehiengo oso estu batek babestu du akordioa: 7 ordezkari alde eta 6 kontra.
Ondorioz, CCOOk ez du sinatuko ituna eta proposatuko dio Langile Batzordeari behargin guztientzako bozketa deitzea. STATek eta Independenteek eskaera bera egin zuten atzo, baina ez zuen aurrera egin.
Gauzak horrela, 233 eguneko greba luzatuko da korapilo hori askatu arte. Ikusteke dago ELA eta LABen erantzuna CCOOk adierazitako ekimenari dagokionez.
Edonola ere, gaurko emaitzak ez dira oso argigarriak izan. ELAren afiliazioaren bozketa izan da hurrengoa: 125 alde, 50 kontra, 2 zuri eta boto baliogabe bat. CCOOren kasuan, %67ak babestu du akordioa. LABek eta STATek kontra bozkatu dute. Hain zuzen, STATeko 67 kidek aurkako boza eman dute eta 47k aldekoa.
Sindikatu Independenteak ez du ezta bozkatu ere egin eta atzoko planteamenduari eutsi dio, langile guztiek bozkatu behar dutela aldarrikatuta.
Astelehenean bilera
CCOOk deituta, astelehenean batzarra egingo du Tubacexeko Langile Batzordeak. Hala ere, ELAk aurreratu du, Eusko Jaurlaritzarekin adostu bezala, gehiengoak testua babesten duela ikusita, astelehenean hitzordua eskatu dutela Gasteizen ituna sinatzeko.
Eusko Jaurlaritzak, ordea, azaldu dio sindikatuari CCOOk bere jarrera argitu arte, komenigarria dela batzarra ez egitea.