Enpresa batzordeak oniritzia eman dio Eusko Jaurlaritzaren proposamenari

Aimar Gutierrez Bidarte 2021ko urr. 4a, 10:26

Tubacexeko langileak Laudioko piketean, greba mugagabearen 236. egunean. / Tubacexeko langileak

9:00etan elkartu da Tubacexeko Enpresa Batzordea, ostiraleko afiliatuen asanbladaen ostean Eusko Jaurlaritzaren proposamenari onespena eman edo langile guztien bozketa orokor bat deitzea erabakitzeko asmoz. Langileen ordezkarien gehiengoa akordioa sinatu eta greba mugagabeari amaiera ematearen alde azaldu da.

Tubacexeko Enpresa Batzordeak argi berdea eman dio Eusko Jaurlaritzak lan gatazkari amaiera emateko aurkeztutako proposamenari. Ostiralean enpresan ordezkaritza duten sindikatuen afiliazioaren esku geratu zen proposamenari oniritzia ematea. LAB eta STAT sindikatuak akordioaren aurka azaldu ziren, Independenteek bozketa orokorra eskatu zuten, eta, azkenik ELAk eta CCOOk akordioa babestu zuten.

Akordioa, beraz, oso gehiengo estu batek babestu zuen: enpresa batzordeko 7 ordezkari alde eta 6 kontra. Hain zuzen ere, gehiengo estu horrek zalantzak sortu zituen CCOO-n, nahikoa ez zela iritzita, eta bozketa orokorraren alde egin zuten sindikatu horretako ordezkariek.

Greba mugagabea amaitzear

Gaurko bileran posizionamendua argitu du enpresa batzordeak, eta ostiralean lortutako gehiengoarekin akordioa sinatzearen alde egin dute, bozketa orokorrik egin gabe. Langileen ordezkariek Eusko Jaurlaritzako Enplegu Sailari jakinarazi diote erabakia, eta gaur eguerdiko 13:30etan batzartu dira hiru aldeak Bilboko Eusko Jaurlaritzako egoitzan.

Akordioa sinatu arte indarrean jarraituko du dagoeneko 236 egunez luzatu den greba mugagabeak.

Ekonomia

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.

Izan bazkide