BOR-BOR ELKARTEA

Eskualdeko emakume sortzaileak saretzeko azoka antolatzeari ekin diote, elkarlanean

Urtean zehar hainbat jarduera antolatu ditu Bor-bor feminismo elkarteak Faktorian. / Aiaraldea.eus

Urriaren 24an deitu dute Aiaraldeko emakume sortzaileen asanblada irekia Aiaraldea Ekintzen Faktorian. Azaroaren 20an azoka bat antolatuko dute, aurreratu dutenez, Euskal Herriko Dinagu nomadak gaittun azoka ibiltariarekin batera. 

Aiaraldea Ekintzen Faktoriako feminismo lantaldeak (Bor-Bor elkarteak) ekimen berria jarri du martxan. "Eskualdeko emakume sortzaileak euskaraz saretzea" eta euren lanak zein ezagutzak sozializatzea izango da helburu nagusia. Gainera, Euskal Herriko emakumeek osaturiko Dinagu kolektiboaren "Nomadak gaittun" dinamikarekin egingo du bat azokak. Horretarako data hautatu dute jada: azaroaren 20a. Alabaina, partaide kopuruaren arabera, Bor-Bor elkarteak ez du baztertzen asteburu osora luzatzea jarduera. 

Euskal Herriko emakumeek osaturiko Dinagu kolektiboaren "Nomadak gaittun" dinamikarekin egingo du bat azoka

Urriaren 12an egin zuten ideia garatzeko lehenbiziko bilera irekia, Faktorian bertan. Hainbat diziplina eta sorkuntzetako kideak hurbildu ziren hitzordura, eta urtean zehar bailarako herrietan errepikatzeko ekintza bateratua diseinatzen ari dira. Iganderako -urriak 24- deitu dute hurrengo bilera, 18:30ean Aiaraldea Ekintzen Faktorian (Errotari kalea, 4-8 pabilioia, Laudio). Modu horretan, behin-betiko egitaraua zehaztuko dute partaide guztien artean. 

Izen-ematea, zabalik

Interesa duen sortzaile orok eman dezake egitasmorako izena, feminismoa@aiaraldea.eus posta helbidera mezua bidalita. Horretarako epea, urriaren 24an bukatuko da. Bor-borreko kideen hitzetan, bestelako dinamika batzuk ere dituzte buruan: eskualdeko emakume ekoizleen katalogo edo aldizkaria osatzea, artisau zein ekoizleen aurkezpen saioka antolatzea eta abar. 

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide