Aiaraldeko Txakolina promozionatzeko kanpaina bat egingo da hilabete honetan Gasteizen, Arabako Txakolinaren eta Kutxiko Taskeroen eskutik. Eskualdeko ardoak dastatzeko aukera egongo da Kutxi kaleko 30 establezimendutan, urriaren 22tik 24ra bitartean. Trikitilari eta txistularien kalejirak ere antolatuko dituzte, giroa animatzeko.
Urriaren 20an egingo dute ekimenari hasiera emateko brindisa, 13:00etan Fariñaseko izkinan. 21an, aldiz, txakoli dastatzea egongo da Landatxo del Campillo txokoan, 19:00etatik 20:30etara.
Arabako Txakolinako arduradunek eskerrak eman dizkiote Kutxiko Taskeroak taldeari "txakolinaren defentsa" egiteagatik. "Egoera oso larri batetik atera berri gara ostalariak zein ekoizle txikiak".
Ekoizpen jaitsiera nabarmena
Iragan astean susmoa zena errealitate bilakatu da dagoeneko: aurtengo txakolin uzta iazkoa baino nabarmen txikiagoa izango da. %40ko beherakada aurreikusi dute. Hala ere, jasotzen ari diren fruituak "osasuntsuak eta kalitate onekoak" dira. Horregatik, balorazio kualitatiboa positiboa izango delakoak dago jatorrizko izendapeneko arduraduna.
Mahats bilketa erritmo onean doa, eta beste astebetez luzatzea espero dute. Abenduan egingo dituzte lehenbiziko aurre-dastatzeak.