Aiaraldeko Euskalgintza Kontseiluak abenduaren 4an gauzatuko duen ospakizunaren egitarauaren aurkezpena egin zuen atzo. Kontseiluko kideek ez ezik, herritarrek eta ordezkari politikoek hartu zuten parte agerraldian, eta 12 orduko programa zabaldu zuten.
Izan ere, Christian Alemanyk aipatu moduan, goizeko 11:00etatik gaueko 23:00ak bitartean egongo dira ekintzak Luiaondon. Hala ere, jaialdia lehenago hasiko da: 09:00etan Urduñatik abiatuko dira mendi zein errepide txirrindulariak. Laudion, aldiz, 09:30ean izango da hitzordua.
Hala, 11:00etan batuko da jendea Luiaondon, eta berehala kalejira bi hasiko dira. Batek Otazun izango du irteera eta besteak tren geltokian. Jarraian umeen eta gazteen eskaintzak hartuko dute garrantzia Malatun, non Kokoriko eta Kirikiño elkarteen karpak egongo diren jolasekin. Kirolak ere tartea izango du: 3x3 saskibaloi eta futbito txapelketa antolatuko dituzte.
Aiaraldea Komunikabideak, berriz, zuzeneko emisioa egingo du; eta Aiaraldeko euskara sortzaileen azoka ere prestatuko dute herrigunean.
12:00etan eta 13:30ean Mikel Martinez antzezlearen Tabernaria bakarrizketa ikusteko aukera egongo da Otueta Gizarte Etxean. Patxo Telleria da lanaren zuzendaria eta Araban gutxitan egon da ikusgai.
13:00etan, berriz, ekitaldi nagusiaren txanda helduko da. 2016ko Euskararen Egunaren remixa zabaldu dute horretarako, eta eskualdeko hainbat ikasleren parte hartzea espero da, dantza lantzen ari baitira ikastetxeetan.
Horren ostean, herri bazkariaren txanda helduko da. Jarraian hasiko dira kontzertuak:
- 15:00etan Kateak Ate taldeak emanaldi akustikoa proposatuko du.
- 16:00etan Patxi eta Konpainia Iparraldetik etorriko dira euren ohiko dantza plazarekin.
- 18:15ean Mugan pop-rock taldearen unea izango da.
- 19:30ean XSakara musikariak euskal traparen doinuak zabalduko ditu.
- 20:45ean Izate Faltsuak tokiko metal taldeak hartuko du oholtza.
- 22:00etan Nikotinak reggae, rap eta dance hall generoak uztartuko ditu amaitzeko.
Bertso poteoa
Horrez gain, 18:15ean Sustrai Colina, Izar Mendiguren Cosgaya eta Julen Zelaieta bertsolariek Luiaondoko tabernetan inprobisasio emanaldiak eskainiko dituzte.
Azpimarratu dutenez, Aiaraldeko Euskalgintza Kontseiluak lanketa egin du Luiaondoko tabernari eta merkatariekin zerbitzua euskaraz errazteko. Izan ere, aurtengo jaiaren leloa "Mintzatu, kontsumitu, inplikatu, Euskaraktibatu Aiaraldea" da.
Aipatzeko da ere deitutako bideo lehiaketaren emaitza abenduaren 4an jakinaraziko dutela.