Aurreko astean ekin zioten Euskararen Nazioarteko Egunaren ospakizunei bailaran. Okondon, esaterako, ardo kata antolatu zuten, eta hilabete osora luzatuko dituzte hizkuntzaren aldeko ekimenak. "Larunbatean hasi ginen ardo dastaketarekin, gaur ipuin kontalaria egon da eskolan eta datorren larunbatean intxaursaltsa tailerra egingo dugu", adierazi du Naiara Otaola euskara zinegotziak.
Amurrion, berriz, grafiti tailerra burutu zuten herriko gazteek atzo, eskola guztietako parte hartzearekin. Gaur, berriz, irakurtaldi saioa deitu dute, eta arratsaldean emango diote segida egitarauari, kandelen ekitaldiarekin eta txokolate janarekin.
Laudion, aldiz, adierazpen instituzionala plazaratu dute hamabietan, eta Arloteen emanaldia egon da segidan. Laudioko ikastetxe eta euskaltegi guztietako ordezkariek hartu dute hitza Herriko Plazan egin duten ekitaldian, eta bakoitzak euskararen aldeko mezu bana utzi du, gutun, bertso zein kanta formatuan. Datozen orduetarako, baina, egitarau oparoa prestatu dute: bertso saioa, mago ikuskizuna, musika kontzertua eta beste.
Urduñan arratsaldean pilatuko dituzte jarduerak, atzo ihes gela eskaini zuten arren. Hala, disko festa eta ipuin kontalariak izango dira nagusi gaurko arratsaldean zehar, Foru plazan zein Alondegian.
Argazkiak: Amurrioko Euskara Zerbitzua, Naiara Otaola eta Aimar Gutierrez Bidarte