Juli Goitia eta Pili Gumuziok eginiko lanari aitortza, Aretako Gure Orkestraren lehen emanaldian

Orkestraren proiektuak aurrera jarraitzen duela nabarmendu zuten Aretako Guraso Elkarteko kideek kontzertuaren hasieran, eta herritar guztiei luzatu zieten egitasmoa laguntzeko gonbita. 

Iragan abenduaren 23an izan zen Aretako Gure Orkestraren lehen emanaldia, frontoian. Barakaldoko Arteta musika eskolako kideek eta Santutxuko Isabella Naranajo gazteak ere parte hartu zuten kontzertuan. 

Ikasturte hasieran sortu zen Aretan haur eta gazteen orkestra bat sortzearen ideia, Aretako Kultur Etxean. 'Musika guztiontzat' dinamika jarri zuten martxan bertan, Venezuelako Haur eta Gazte Orkestra Sistema Nazionalean oinarrituta. 

Sistema horren funtsa honakoa da: haur eta gazte guztiei musika ikasteko aukera ematea, dituzten baliabide ekonomikoei erreparatu gabe. Modu horretan, kultura eta egoera sozioekomiko ezberdinetako haurren arteko harremana estutzea dute helburu. "Proiektuaren berri izan genuenean, Aretara ekartzeko lanean hasi ginen eta ez zitzaigun bat ere zaila suertatu beste guraso batzuk batzea", azaldu zuten Aretako Guraso Elkarteko kideek emanaldia hasi baino lehen eginiko hitzartzean. 

Juli Goitia eta Pili Gumuziori aitortza

Hala ere, frontoian gogorazi zutenez, Aretak musikarekin duen erlazioa ez da berria. "Aspalditik izan ditugu trikitilariak, txistulariak, pandero-joleak eta bestelako musikariak gure kaleak alaitzen egutegiko data esanguratsuetan". Aretan egon diren musika irakasle "zoragarriak" ere ekarri zituzten gogora: "Guztien artean, batez ere bi gogoratzen ditugu: Juli Goitia eta Pili Gumuzio. Bi emakume horiek beraien etxeetako ateak herriari zabaldu zizkioten eta gutariko askok beraien klaseetara joateko aukera paregabea izan genuen". 

Azaldu zutenez, Goitia eta Gumuziok klaseak emateko modu eta izaera propioa zuten, baina biek zuten musikarekiko "pasio eta maitasun" bera. "Juli beti irrabarretsu eta maitakor, herriko ekitaldi guztietan laguntzeko prest zegoen. Gutariko batzuk, nahiz eta klaseetara ez joan, oraindik oroitzen ditugu bere pianoaren notak leihotik ateratzen eta ondoko parkera iristen, jolasten genuen bitartean. Pribilegioa zen". 

Herriko haur eta gazteek aukera dute oraindik orkestrara batzeko

Antzeko hitzak baliatu zituzten Piliren jarduna deskribatzeko: "Musikarekiko grina berbera zuen eta langile nakaezina zen. Ikasle batzuen esanetan, irakasle zorrotza zen. Berak dena ematen zuen eta inplikazio berdina eskatzen zien ikasleei". Hala ere, guraso elkarteko kideen esanetan, Aretako musika irakasle hori "ama" bat bezalakoa zen guztientzat, "ikasle batzuen esanetan, bere etxean hazi ginen". 

Gauzak hala, guraso elkarteko kideek aitortu zuten "aspaldian eraindako hazi horrek" ahalbidetu duela oraingo proiektua loratzea. Era berean, proiektuak "zabalik" jarraitzen duela nabarmendu zuten. "Nahi duen haur edo gazte oro batu daiteke, auzokoa edo herrikoa. Ekarri behar duen gauza bakarra, ikasteko eta gozatzeko gogoa da". 

Ekimena laguntzeko deia

Bukatzeko, orkestrari laguntzeko deia luzatu zuten gurasoek. Alde batetik, instrumentuak dohaintzan emateko gonbita luzatu zieten herritarrei. Nabarmendu zutenez, egoera txarrean dauden instrumentuak ere onartuko dituzte, proiektuaren barruan luthierrak daudelako, beharrezko konponketa lanak egiteko prest. 

Bestetik, "instituzio, enpresa eta partikularren inplikazioa" eskatu zuten. "Komunitate osoaren elkarlana ezinbestekoa da proiektua hazten jarraitzeko eta ahalik eta haur eta gazte gehien hartu ahal izateko". 

Argazkiak: Aretako Guraso Elkartea

Erlazionatuak

Musika eta musika tresnak, denon eskura

Laudio Areta

“Musika guztiontzat” ekimena abiatu zuten urrian Aretako Kultur Etxean. Venezuelako gazte eta haurren orkestra eta abesbatzen sistema e...

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide