Kultur sorkuntza Aiaraldean

Aiaraldea eta aiaraldearrak pantailaren bi aldeetan

Aiaraldea hainbat aldiz agertu da aurten pantaila handi zein txikian, hainbat zinemagile bertaratu baitira bailarara euren proiektuak grabatzera. Eskualdeko sortzaileak ere ez dira geldirik egon, eta lan ugari plazaratu dituzte aurten, sari ugari lortuz hainbat kasutan. 

Érase una vez en Euskadi

Érase una vez en Euskadi filmaren grabaketan parte hartu zuen Leire Oruetak. Urriaren amaieran iritsi zen zine-aretoetara 1980ko hamarkadako Euskal Herrian girotutako filma. Pelikularen arte departamentuan egon zen gazte laudioarra. Bere lehengo esperientzia izan zen lan horretan, baina ez bakarra. Modelo 77 filmean ere lan egin du, eta Bird Box filmaren spin-off-aren ekoizpenean murgilduta dago orain. 

Armugan

2019. urtean grabatu zuten Iñigo Martinez protagonista duen Armugan filma, baina aurten estreinatu da, eta hainbat sari jaso ditu zinema jaialdietan. Ezohiko pertsonaia hezur-haragitzen du Martinezek ikus-entzunezkoan: herritarrei heriotzara arteko prozesuan laguntzen dien pertsona batena.Une honetan, Filmin plataforman ikusi daiteke pelikula, eta Orozko zein Laudion proiektatuko dute datozen egunetan.

Asko falta da?

Asko falta da? film laburra grabatu du aurten Ane Cuesta Morgek. Ikus-entzunezko ikasketak bukatzen ari da gazte zolloarra, eta bere klasekide batzuekin osatu du proiektua. Zenbait aktore ospetsu agertzen dira pelikulan. Bortxaketa baten istorioa kontatzen du, bizipen erreal batzuetatik abiatuta. Azkar grabatu zuten ikus-entzunezkoa, klaseko lan bat zelako, baina diru bilketa abiatu zuten gero, emaitza hobetzea helburu. 

Daniel|a|

Mikel Ayllon idazle laudioarra dago Gazteak plazaratutako Daniel|a| proiektu transmediaren atzean. 6 atalez osatutako websail bat da egitasmoaren funtsa, eta podcast bat eta webgune bat ditu osagarri. Aiaraldea Ekintzen Faktorian grabatu zen azken atalean agertzen den kontzertua. Ayllonek iaz argitaratutako Zoriontsuak izatea aukeratu genuen ipuin-liburuko azken kontakizuna du abiapuntu ikus-entzunezkoak. 

Polvo somos

Ibilbide oparoa izan du Esti Urresolaren Polvo somos film laburrak. Zinebi  jaialdiaren 62. edizioan estreinatu zen pelikula, eta bi  sari jaso zituen bertan. Gasteizko Cortada jaialdian, aldiz, Arabako film labur onena gisa hautatu zuten, eta pelikula motz onena izan zen Euskal Zinemaren astean. Zilarrezko bi biznaga jaso zituen Malagako Jaialdian, eta Goya sarietako hautaketa fasera igaro zen, azkenean izendapena lortu ez duen arren. 

Los días que (nunca) fueron

Kevin Iglesias zinemagile amurrioarrak zuzendu du Los días que (nunca) fueron animaziozko film laburra, Pedro Riverorekin batera. Zinemaldian, Zinebin eta Sitgeseko jaialdian proiektatu da pelikula, eta Filmimen zein ETB 1 eta 2 kateetan ere eskainiko  dute. Fermin Muguruza musikari eta zinemagilea arduratu da pertsonaietako bati ahotsa jartzeaz, ikus-entzunezkoaren euskarazko bertsioan. 

Life in the XXI century

Iosu Vaquerizo zinemagile laudioarrak (egun Oslon bizi dena) zuzendutako film hau saritua izan da zinema jaialdietan. 

El himno mundial

Okondon grabatu zituzten film luze honetako hainbat eszena, adinekoen zentroa "ospitale apokaliptiko" bilakatuta. Liburu batean oinarrituta dago filma:

Noiz utziko dio euria egiteari

Guillermo Ordasek zuzendutako ikus-entzunezkoa, Piszifaktoriaren (Mikel Ayllon, Igor Arzuaga) kaleko ikuskizunean oinarrituta.

Urduña Bizkaiko Memphis

Urduñako musika mugimendu aberatsari buruzko dokumentala osatu du Roberto Cuesta zinemagileak. Youtuben dago ikusgai osorik.

Bizi-txarra

Laudion grabatu zituzten websail honetako hainbat eszena, eta Ada Kusmierz laudioarrak parte hartu zuen ikus-entzunezkoaren ekoizpenean. 

Camila Hunck

Artziniega Museoan grabatu dute Camila Hunck, Ramon Barea eta Leire Orbe aktoreekin. Maquisen eta Neanderthalen historiak batzen ditu filma laburrak. 

 

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide