Osakidetzak eguerdian zabaldu du COVID-19 birusari buruz egindako azken txosten epidemiologikoa. Emaitzek azken asteetako joera baikorra apurtzen dute. Izan ere, kutsaketa maila apur bat handitu da eta intzidentzia metatuaren tasak hazi dira eskualdeko herri gehienetan.
Guztira, 385 gaixo berri berretsi zituen osasun sistema publikoak urtarrilaren 27tik 30era bitartean:
- Amurrio: 130 (35 ostegunean, 43 ostiralean, 30 larunbatean eta 22 igandean).
- Artziniega: 13 (2 ostegunean, 4 ostiralean, 4 larunbatean eta 3 igandean).
- Aiara: 26 (8 ostegunean, 8 ostiralean, 8 larunbatean eta 2 igandean).
- Laudio: 143 (41 ostegunean, 56 ostiralean, 23 larunbatean eta 23 igandean).
- Okondo: 9 (2 ostegunean, 4 ostiralean eta 3 larunbatean).
- Arakaldo: 4 (2 ostiralean eta 2 igandean).
- Arrankudiaga-Zollo: 5 (4 ostiralean eta 1 igandean).
- Orozko: 20 (3 ostegunean, 6 ostiralean, 6 larunbatean eta 5 igandean).
- Urduña: 35 (13 ostegunean, 12 ostiralean, 5 larunbatean eta 5 igandean).
Hain zuzen, duela astebete (355 kasu) eta bi aste (379) baino positibo gehiago topatu ditu Osakidetzak. Hori aintzat hartuta orain bakarrik egiten zaiela PCR proba baja behar duten herritarrei edo sintoma larriak dituztenei.
Intzidentzia metatuaren tasa, gora
Horrek eragina izan du, aldi berean, udalerrietako intzidentzia metatuen tasetan. Berez, Aiaraldeko 5 herriren kopuruek egin dute gora: Amurriokoak, Artziniegakoak, Aiarakoak, Okondokoak eta Arakaldokoak. Hazkundea ez da oso aipagarria izan, baina beherantzako joera apurtu du. Hain zuzen, deigarria den gorakada bakarra -grafikoan ikus daitekeen moduan- Arakaldokoa da, baina biztanle oso gutxi dituenez, jazotako 4 positibok tasa desitxuratzen dute, nolabait.