Urte bete igaroko da otsailaren 11n Tubacexeko greba mugagabea abiatu zutenetik. Kaleratzeen aurkako lan gatazka 236 egunez luzatu zen, eta Aiaraldean azken urteetan egondako mobilizazio ziklo handiena piztu zuen.
Urteurrenaren testuinguruan mendi martxa antolatu dute greban murgilduta egon ziren beharginek, eta Laudio eta Amurrio lotuko dituzte oinez. Otsailaren 13an jarri dute hitzordua. 8:00etan abiatuko dira Laudioko Arantzar poligono industrialetik, apirilaren 21ean egin zuten mendi martxaren kontrako noranzkoan. Norberak bere hamaiketakoa eramateko mezua zabaldu dute.
236 egun greban
2021eko otsailaren 11an greba mugagabea abiatu zuen Tubacexeko enpresa batzordeak, zuzendaritzak ezarri nahi zituen 150 kaleratzeak ekiditeko. Hasierako negoziazioek kale egin zuten, eta 8 hilabetez luzatu zen lan gatazka.
Grebak iraun bitartean Aiaraldean azken urteetan ikusitako mobilizazio ziklo handienetako bat piztu zen, eta manifestazio jendetsu ugari egin ziren Laudion eta Amurrion. Era berean, lan gatazkak oihartzuna izan zuen eskualdeko beste enpresa eta lantokietan, eta grebak iraun zituen 236 egunetan oso ugariak izan ziren elkartasun keinu eta mobilizazio bateratuak.
Urriaren hasieran erdietsi zuten akordioa enpresarekin. Kaleratzeak saihestu eta lanera bueltatu ziren beharginak, greba historikoari amaiera emanez.