.jpg)
Borroka kirolak ere normaltasunera itzultzen ari dira apurka-apurka Aiaraldean. Martxoaren 5ean borrokaldia antolatuko dute Bañueta Kiroldegian, Amurrion. Sarrerak 18 euro balioko du egunean bertan eta 15 aurretik.
Zehazki, Aiara Fighters ekimenaren edizio berria izango da, hirugarrena jadanik, eta eskualdeko lau kirolarik neurtuko dituzte indarrak. Neil Capelan eta Ibai Ruiz amurrioarrek Chock Dee taldea ordezkatuko dute, eta Bilal Ben Yechou eta Brahim Salih Laudiotik joango dira. Bilal Hajime klubeko kidea da eta Brahim, aldiz, Kuraiakoa, baina azken horrek ere entrenatzen du Hajimeren gimnasioan.
Jorge Bengoa laudioarrak ere parte hartu behar zuen kirol hitzorduan, baina azken unean Euskal Herriko Federazioak jakinarazi dio Espainiako Federazioak sakatu duela borrokatu ez dadin. Antza, erakunde espainiarrak ez du baimentzen 40 urte baino gehiagoko lagunak ringera igotzea. Bengoak gogor kritikatu du erabakia: "5 borroka egin ditut 40 urteko muga gaindituta, eta ez dut inoiz arazorik izan. Ez zait iruditzen zentzuko neurria. Edonork egin dezake maratoi bat 40 urteak gainditut,a eta niri ringean aritzea debekatu didate. Fisikoki sasoi-sasoian nago eta, hala ere, tatamian lehiatzea soilik baimenduko didate hemendik aurrera".
Laredo Open
Dena den, Bañuetako hitzordua heldu baino lehen, Ibai Ruizek beste erronka bat izango du asteburuan Laredo Openean. Kantabriara joko du amurrioarrak lau ikaslerekin. Bik debuta egin dute jada; Aratz Casadok eta Azkain Menoyok. Beste biek lehenengo borroka egingo dute; Neil Capelanek eta Valentín Shparkyik.