Oharra plazaratu du Ezker Anitzak Laudioko Udal Hiltegiaren itxieraren afera dela eta. Miguel Burdallo ordezkariaren ustez, EAJk eskualdeko abeltzainak abandonatu ditu. Politikari laudioarrak azaldu duenez, bere taldeak Arantxa Tapiari galdetu zion aferaren inguruan, eta sailburuak erantzun zion hegaztien hiltegi bat irekitzeko aukera aztertzen ari direla. “Harritu egiten gaitu horrek, eskualde honetako baserrietan abereak direlako nagusi”.
Burdallorentzat, “ulergaitza” da Hiltegia ez itxi! plataformaren iritzia kontuan hartu ez izana Laudioko azpiegitura itxi zenetik eman diren urratsetan. Ezker Anitzako kideak gogorarazi du bere taldea abstenitu egin zela Aiaraldea ekonomiko suspertzeko plana legebiltzarrean bozkatu zenean, taldearen proposamen nagusiak kontuan hartu ez zirelako eta kontuan hartu zirenak “desitxuratu” egin zirelako. “Denbora gutxi igaro behar izan da ikusteko ponentziaren lan-lerroak ez dituela kontuan hartzen eskualdearen benetako beharrizanak”.
Era berean, Ezker Anitzako kideek “tristetzat” jo dute sailburuaren atzetik joan behar izatea HAZIren txostenaren ondorioen berri jasotzeko. Era berean, nabarmendu dute prentsaren bidez jaso dutela Berehalako Ekintza Planaren edota Enkarterrietan ireki nahi dute hiltegiaren berri. “Opakotasuna etengabea da Arantza Tapiaren departamentuan”. Gauzak hala, galdera-sorta berria erregistartuko du opozisioko taldeak legebiltzarrean, gaian sakondu eta Tapiaren “erantzunak eta ez-erantzunak” argitu ahal izateko.