Aiarako Kuadrillak zenbait jarduera prestatu du 'Aiaraldea Zirkularra' ekimenaren barruan. Alde batetik, maiatzaren 8an 11:30etik 14:30era Laudioko Herriko Plazan egingo da 'Truke Egunaren' lehenengo edizioa.
Jardunaldi horren helburua izango da bigarren erabilera izan dezaketen elementuen bizitza baliagarria luzatzea. Parte-hartzeko nahikoa izango da Truke Kutxarekin batera egongo den postura hurbiltzea objektu trukagarri batekin: jostailua, liburua, bizikleta, dekorazio-elementua, etxe-tresna elektriko txikia...
Gauza bat utziz gero, ikusgai dagoen beste bat hartu ahal izango da, edo beste erabiltzaile bat momentuan entregatzera doana hartu. Merkatua bi begiralek dinamizatuko dute, eta, bide batez bertaratzen diren pertsonak Laudioko Garbigunean instalatutako berrerabilgarrien etxolarekin lotutako Aiarako Kuadrillako berrerabilpen-plataforma berrian izena ematera animatuko dituzte. Apuntatzen direnen artean eskualdeko produktu-sorta zozketatuko da.
Halaber, maiatzaren 22an bigarren eskuko azoka egingo da Amurrion.
Ekintza horiekin batera, Aiarako Kuadrillak laster argitaratuko du 'Eskualdeko erreparatzaileen gida'.
Gogoratu beharra dago helburu berarekin hainbat truke kutxa instalatu zirela Aiaraldean iaz:
- Laudio: Aretako Erretiratuen Zentroa eta Lamuza Parkeko Etxe Nagusia eta eskolak.
- Amurrio: Udala, Kultur Etxea eta San Jose Gizarte Etxea eta eskolak.
- Aiara: Otueta Gizarte Etxea eta Etxaurren Ikastola.
- Artziniega: Udal liburutegia.
- Okondo: Udal liburutegia.