ARGAZKIAK

Serapio Lopezek jantzi zion txapela Arabako txapelketan Peru Abarrategi Sarrionandia irabazleari

Izar Mendiguren Cosgaya 2022ko eka. 14a, 09:03
Deskargatu Info Ahotsak :

Aiaraldeko ordezkaritza zabala egon zen Arabako Bertsolari Txapelketako finaleko sari banaketan. Irabazleari txapela jartzeko ohorea emanda eskertu zuten Serapio Lopez baranbioarrak urteetan bertsolaritzaren alde eginiko lana.

Laudion hasi eta Gasteizen amaitu zuen 2022ko ibilbidea Arabako Bertsolari Txapelketak. Faktorian aurkeztu zuten lehiaketa martxoan, eta larunbatean izan zen finala Gasteizko Europa jauregian. 30 bertsolarik hartu dute aurtengo edizioan parte guztira, eta ondorengo seirak heldu ziren azken txanpara, finalera alegia: Manex Agirre Arriolabengoa, Oihane Perea Perez de Mendiola, Xabi Igoa Eriz, Paula Amilburu Izargarai, Iñaki VIñaspre Simon eta Peru Abarrategi.

600 lagun elkartu ziren saioa bertatik bertara gozatzeko, eta buruz-burukoa Manex Agirre Arriolabengoak eta Peru Abarrategi Sarrionandiak jokatu zuten. Hargatik, bi horiek ordezkatuko dute Araba Euskal Herriko Txapelketa Nagusian.

Sari banaketarako Arabako eragileak aukeratu zituen Bertsozale Elkarteak, eta eskualdeko kide ugari igo ziren oholtzara. Serapio Lopezek jantzi zion txapela Peru Abarrategi Sarrionandia irabazleari

Sari banaketan, Aiaraldear ugari

Sari banaketarako Arabako eragileak aukeratu zituen Bertsozale Elkarteak, elkarlanaren adierazle gisa. Hala, eskualdeko kide ugari igo ziren oholtzara.

Esaterako, Belate Olabarria Astobizak Euskal Herriko Bertsozale Elkartearen izenean (Bizkaiko Bertsozale Elkarteko lehendakaria da egun) eman zion Manex Agirre Olabengoa bigarren sailkatuari garaikurra.

Begoñe Olabarria Astobizak, aldiz, Aiaraldea Ekintzen Faktoriako kide gisa entregatu zion Peru Abarrategi Sarrionandia txapeldunari saria; eta Serapio Lopezek jantzi zion txapela ondoren. 

Modu horretan eskertu nahi izan dio Arabako Bertsozale Elkarteak lurraldean bertsogintzaren alde eginiko lana. Izan ere, Aiarako Bertso Eskolako kidea izan da urte luzez Serapio Lopez. Baranbioarrak bertso eta guzti eskaini zion txapeldunari, Pello Joxepe doinua erabilita: 

Bejondeizula ta zorionak

Peru zein saio itzela!

Neri txapelik sekula inork

ez dit jantzi dena dela

seme-alabei Peru zuk esan

eta jakin dezatela

Bi mila eta hogehitabian 

nork jantzi zizun txapela!

 

 

Kultura

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide