"43.5 graduko tenperatura erregistratu du Euskalmet Agentziak Gardean, hori datu historikoa da. Bere ibilbidean erakundeak ez du inoiz hain tenperatuta altuak detektatu uztailean Aiaraldean". Hala adierazi dio Hodei Atxa metereologia zaleak Aiaraldea Komunikabideari.
Izan ere, Atxak azken bero olatuaren jarraipena egin du eta harrituta dago tenperaturek gora egin dutelako, nahiz eta ipar haizeak jo duen arratsaldetan: "Hego haizea egon da, baina soilik goizetan eta hala ere, giroa ez da freskatu arratsaldetan".
Inoiz ez da horrelako daturik jaso
Atxak azpimarratu du Euskalmetek ez duela inoiz horrelako tenperatura alturik jaso, gutxienez, uztailean. Gainera, gogoratu du horrelako egoerak oso arriskutsuak direla: "Ez du euririk egin, larreak lehortu dira eta suteak gertatzeko aukerak biderkatu dira. Zorionez, Aiaraldean ez da suterik egon, Lautadan, Añanan edo Arabar Errioxan ez bezala".
Atxak azpimarratu du ingurumenean kalteak eragin dituela bero olatuak eta ibaien ura 25 gradura heldu dela
Dena den, metereologia zalearen aburuz, bero olatua kaltegarria izan da: "Animaliek izugarri sufritu dute eta, adibidez, intsektu pilo ikusi dut beroagatik hil direnak. Ibaien uraren tenperatura ere asko igo da, 25 gradura helduta".
Afrikako aire beroa
Aiaraldea Komunikabideak galdetu dio Atxari ea aldaketa klimatikoa dagoen bizi izan den bero kolpearen atzean eta laudioarrak testuinguru zehatza ere aipatu du: "Jakina, klima aldaketak eragiten du, baina kasu honetan zein ekainean izan genuen bero olatuan, jatorria izan da Afrikako aire beroa. Ozeano Atlantikotik sartu da Portugalera eta handik gugana heldu da. Urrutitik etorri denez, ez du ekaitzik sortu. Egia esanda, Ingalaterran eta Frantziako Estatuan ere nabaritu dute. Ez nuke esango zuzenean klima aldaketaren ondorioa izan denik, baina patroi bat dago hor".
Etenaldia, baina beroa
Gaurko enbatarekin amaituko da azkenaldiko bero olatua, baina horrek ez du esan nahi berorik egingo ez duenik. Atxak hala argitu du: "Arabako toki gehienetan hurrengo egunetan oraindik muturreko tenperaturak egongo dira. Aiaraldean, ordea, nahiz eta altuak izan, ez dira horretara helduko, 30 gradutan mantenduko dira agian".