Uztailean iragarri bezala, irailaren 10ean, hau da, larunbatean, Orozkon eta Laudion aurreikusitako proiektu eolikoen aurkako mendi ibilaldiak egingo dituzte. Zehazki, 10:00etan abiatuko dira Laudioko -17 kilometroko luzera- eta Orozkoko -12 kilometroko distantzia- herriko plazetatik.
Mobilizazioaren helburua da salatzea 200 metroko bost aerosorgailu kokatu nahi dituztela Jesuri, Larragorri eta Elorritxugane mendietan, lau Orozkon eta beste bat Laudion. Antolatzaileek astakeritzat jo dute egitasmoa eta honakoa aipatu dute bere tamaina nabarmentzeko: "Ideia bat egin dezazuen, Bilboko Iberdrolaren dorreak 41 solairu eta 165 metro ditu eta Gorbeiako Gurutzeak 17,23 metro".
Energia negozioaren eredua jopuntuan
Aiaraldeko Mendiak Bizirik plataformako kideek kritika ugari plazaratu dituzte proiektuari buruz. Hasteko, ez zaie zilegi iruditzen Capital Energy enpresa pribatuak Europako dirulaguntzekin eta Eusko Jaurlaritzako babesarekin bideratzea egitasmoa: "Beraz, guztion artean ordaintzen dugu, baina etekina enpresak hartzen du. Haiek bakarrik ezin dutenez, Eusko Jaurlaritza prest dago erraztasunak emateko, nahiz eta horretarako lege berriak egin behar dituzten, natura babesteko dauden legeak eta oso garrantzitsuak direnak baliogabetzeko. Hau oso larria da".
Jarri nahi dituzten aerosorgailuek 200 metroko altuera dute eta Bilboko Iberdrola eraikinak, adibidez, 165 metro
Lege moldaketak
Halaber, plataformak gogor salatu du legeak aldatu dituela Eusko Jaurlaritzak -Tapia Legea deiturikoa- udalei eskumenak kentzeko eta horrelako proiektuek eraginari buruzko azterlanik behar ez izateko.
Inguru naturalaren industrializatzea
Egitasmoaren aurkariek azpimarratu dute eremu naturalean aerosorgailuek izango duten eragina: "Mendiak hegazti migratzaileen aerobiak dira. Tamaina honetako aerosorgailu batzuek zarata eta itzal konstante eta garrantzitsuak sortzen dituzte, ez litzateke orain dugun natura eta aisialdi gunea izango. Errotek ere olio-ihesak dituzte lurra eta ura kutsatzen duten errotoreetatik, eta horiek ezinbestekoak dira gure bizi-kalitaterako".
Alternatibak
Zentzu horretan, bestelako neurriak proposatu dituzte haizearekin energia sortzeko: "Industrializatutako edo degradatutako eremuetan energia sor daiteke, bai pabiloi industrialen estalkietan, bai haize-sorgailu txikiagoekin, etxe partikularretan, eta abar...".