Globalizazioaren eta Ameriketako Estatu Batuen hegemonia kulturalaren ondorioz, modu aski ironikoan berreskuratu du Aiaraldeak ia galduta zuen ohitura: Arimen Gaua. Ospakizun hori Halloween jaiaren baliokidea izan da Euskal Herrian antzinatik eta oraindik eskualdean horren lekukotzak topatzea posible da.
Erro horietatik tiraka, beldurra eta dibertsioa uztartzeko hamaika ekintza prestatu dituzte hurrengo egunetarako Aiaraldean. Gehienak haurrentzat badira ere, badaude helduei bideratutako zenbait ere. Egitarauez gain, haurrak mozorrotuta aterako dira kalera goxoki eske, baina ez ahaztu eskaintza zabala egongo dela eskualde osoan.
Batzuek bihar bertan hasiko dituzte ekimenak. Esaterako, Artziniega Museoak bere eguneroko jarduera aldatu eta bisita gidatu ikaragarria gauzatuko du bihar 19:30ean. Parte-hartzaileek kandelak eraman beharko dituzte eta ohiko azalpenen ordez, Arimen Gaua izango da protagonista. Horrez gain, ezustekoak egongo dira ibilbidean zehar. Interesdunek erreserba egin beharko dute 945 396 210 telefono zenbakian edota hurrengo helbide elektronikoan: artziniegakomuseoa@gmail.com.
Udalek eta elkarteek Arimen Gaua ospatzeko hamaika aukera emango dituzte hurrengo egunetan; jaiak, ibilbide ikaragarriak, tailerrak...
Orozkoko Gaztetxokoak ere 'Beldurarren tunela' irekiko du ostiralean 18:00etatik 21:00ak arte, eta larunbatean eta igandean 11:00etatik 13:00etara eta 18:00etatik 21:00etara. Bikoteka egingo dute umeek ibilbidea -lagun batekin edo senideekin egin dezakete- eta horretarako 10 minutu izango dituzte. Haurrek eurek erabakiko dute izuak nahi dituzten eta argiak piztuta egotea nahiago duten, hori bai, sorpresak aurkituko dituzte bidean. Aurretik izena eman beharra dago infoinduma@yahoo.es helbidean edo 946 33 99 45 telefono zenbakian.
Larunbata
Laudioko Udalak Sorgin Zapatuak ekimena Gau Beltzan oinarrituko du, mozorroekin eta kalabazekin eta Laudion ere Drumgorri Aretoak Halloween DJ Jaia ospatuko du. Luiaondon 3 eta 4 urte bitarteko haurrentzako sukaldaritza beldurgarriari buruzko tailerra eskainiko dute 17:30ean. Artziniegan Arimen Gauaren inguruko tailerra prestatuko dute eguerdian Domekero egitasmoaren barruan.
Astelehenean ekintza gehienak
Egitarau gehienek astelehena hautatu dute egun nagusi. Horrela, Urduñan egun osoan egongo dira jarduerak: ipuinak, musika, photocalla eta dantza, besteak beste.
Laudion, aldiz, arratsalde osoa hartuko dute ospakizunek, gaua heldu arte. Aurpegiak margotuko dituzte hasteko, eta gero beldurrezko ibilbidearekin, neguari ongi etorria eginda, Bi Hotsak abesbatzako kontzertuarekin eta txokolatea janda igaroko dute eguna.
Okondon Partyman-en musika eta dantza emanaldia eta txokolatea eskainiko dute eta jarraian Partymanek berak ikuskizuna Orozkora eramango du.
Amurrion Dantzatzeko Prest ikuskizunak 18:00etan hasi eta 21:00etan amaituko da Juan Urrutia plazan.
Aiaran ekintzak biderkatuko dituzte. 17:30ean sukaldaritza tailerra eta disko diskofesta egongo da Arespalditzan eta 19:30ean Diskofesta Luiaondon.