10 urte bete ditu Tokikomek (Euskarazko tokiko komunikabideen taldeak), eta hori ospatzeko ekitaldia egin dute gaur Arantzazulab aretoan, Arantzazun bertan. Horrez gain, Tokikom Sarien ekitaldia ere izan dute, eta Aiaraldea Komunikabidea izan da finalistetako bat. Hargatik, oroigarria eta diploma jaso du Aiaraldeak, beste komunikabideek bezala.
Tokikomeko IKT eta Komunikazio zuzendariak, Joxe Rojasek, azaldu duenez, “perspektiban jarrita, espero genuena baino askoz ere gehiago aurreratu dugu Tokikon martxan jarri zenetik. Aurrerapen hori, oinarrian, bazkide guztiek denbora honetan egindako ahalegin eta bultzadari esker izan da, eta iruditu zaigu gaurkoa aukera ezin egokiagoa zela ahalegin eta lorpen horiei benetan duten meritua aitortzeko”.
Komunikabide taldetik komunikazio taldea izatera igaroko da hemendik aurrera Tokikom, gaurko jardunaldian aurreratu dutenez. Prentsa oharra zabaldu du entitateak, gaurko jardunaldi eta sarien harira.
Tokikom Saria ez da Aiaraldea Komunikabide Faktoriak azkenaldian izandako aitortza bakarra. Kazetaritza eta komunikazioaren alorrean Euskal Herrian sona handia duen Rikardo Arregi sarietako finalista ere hautatu dute, eta azaroaren 30ean jakingo da komunikazio saria nork jasoko duen 2022ko edizioan.