Abenduaren 31n Tolosan lehiatu zen Euskadiko Ziklokros Txapelketa eta Aiaraldeko txirrindulariak erabakigarriak izan ziren emaitzetan, 2021ean bezala. Hain zuzen, Iker Colmenero txapeldun izan zen Kadete kategorian eta Hodei Muñoz eta Iñaki Carro Junior eta Master 30 kategorietan, hurrenez hurren.
Edonola ere, ez ziren horiek buruan aritu ziren eskualdeko kirolari bakarrak. Andoni Etxebarri bigarren izan zen Master 30 diziplinan, eta sailkapen bera lortu zuten Asier Berazak Juniorren eta Gaizka Pujanak Master 40an. Aipatzekoa da Mirari Gotxi laudioarra podiuma zapaltzetik oso hurbil egon zela, laugarren zeharkatu baitzuen helmuga kadeteen artean.
Goraipatzekoa da Iker Colmenerok nagusitasunez irabazi zuela eta 2021eko emaitzak nabarmen hobetu dituela; laugarren izatetik onena izatera igaro baita. Juniorren lerroetan bi aiaraldear borrokatu ziren txapela eskuratzeko: Hodei Muñoz eta Asier Beraza. Muñozek beste Euskadiko Txapelketa gehitu dio bere palmaresari, 2021ean onena izan baitzen. Berazak, bere aldetik, kalitate saltoa eman du eta 2021ean bosgarren izan ondoren, 2022an zilarrezko domina eraman du etxera.
Iñaki Carrok 2021eko txapela berritu zuen, eta Andoni Etxebarri luiaondoarra izan zuen atzetik. Gaizka Pujanak, bere aldetik, bigarren postuan amaitu zuen eta Euskadiko Txapelketako zilarrezko dominari gehitu behar zaio abenduaren 19an irabazitako Arabako Txapelketa.
Azkenik, Mirari Gotxik laugarren postuarekin agurtu zuen Aiala Txirrindularitza Elkartea, hasiko den denboraldian beste talde batean arituko baita.
Argazkiak: Ataria.eus