Arrakasta izaten ari da Aiaraldeko Pentsiodunen Mugimenduak eskualdeko udaletan aurkeztutako mozioak. Aiara, Amurrio eta Laudioko Udal Osoko Bilkuretan plazaratu dute dagoeneko testua, eta hiruretan onartu da, ia aho batez.
Usansolo-Galdakaoko Ospitalera Aiaraldetik autobus-linea zuzen bat jartzea proposatu dute erretiratuek, orain dagoen garraio zerbitzuarekin bidaia luzeegia dela iritsita. “Orain, bataz beste, ordu eta laurden irauten du bidaiak, autobusa Bizkaiko hainbat herritatik igarotzen delako”, azaldu zuten pentsiodunek atzo Laudion eginiko Udalbatzan, “Badakigu kostoa izango lukeela, baina horretarako dago diru publikoa, jendearen bizitza errazteko”.
Horrez gain, ospitaleko osasun langileen egoera ere jarri zuten mahai gainean: “goizeko zortziak baino apur bat lehenago sartu behar dira txanda aldaketa egiteko. Gauzak hala, ezin dute ordu horretako autobus zerbitzua erabili, berandu iritsiko liratekeelako”.
Ia erabateko adostasuna
EAJ, EH Bildu, Omnia, Aiara Batuz eta Orain Amurrio lerratu dira pentsiodunen proposamenaren alde. PSE-EEko zinegotziak, aldiz, abstenitu egin dira. “Ados gaude mozioan funtsarekin, baina ez testuaren erredakzioari lotutako zenbait konturekin”, azaldu zuen Loli Muriel zinegotziak atzo Laudioko plenoan. Bere hitzetan, Bizkaiko Foru Aldundia da autobus zerbitzua ezarri behar duena, “eta mozioan ez zaio aipeman bat bera ere ez egiten”.
Pentsiodunek erantzun zioten ez dutela erakunde hori aipatu Aiaraldeko udalerri gehienak Araban daudelako. Euren ustez, “Arabako Foru Aldundia izan beharko litzateke Bizkaikoarekin gai hau negoziatu beharko lukeena”.
Kontuan hartu behar da Arabako Foru Aldundiko Bide Azpiegituren eta Mugikortasunaren Saila PSE-EEren eskuetan dagoela. Gauzak hala, Sail horretako foro diputatuarekin (Carlos Ibarlucea Martínez) hitz egiteko prestutasuna erakutsi zuen Loli Murielek, mozioak proposatzen duenarekin ados dagoela nabarmenduta.
EAJk ere uste du gauza batzuk hobetu zitezkeela mozioaren erredakzioan. Hala azaldu zuen Ander Añibarrok atzoko plenoan, baina gaineratu zuen mozioaren bozkatuko zutela, “gauza batek ez duelako bestea kentzen”. Era berean, Laudioko alkateak jakinarazi zuen gaiarekin inguruan hitz egin dutela dagoeneko Arabako Foru Aldundiarekin, Aiaraldearentzako osatutako beheralako ekintza planaren testuinguruan.
Urduña eta Okondon, otsailean
Mozioaren aurkezpenkin jarraituko dute pentsiodunek datozen asteetan. Aurreratu dutenez, otsailean aurkeztuko dute Urduña eta Okondon.
Horrez gain, Arabako Batzar Nagusietara ere salto egingo du gaiak, Podemos Ahal Dugu-IUk ekimena aurkeztu baitu horri lotuta.