Gaur aurkeztu dute Aiaraldeko Berdintasun Martxa Neurtuaren IV. edizioa. Martxoaren 19an izango da ibilaldia eta dagoeneko zabalik dago izena emateko epea. Altzarrate eta Kaskagorri kirol taldeek antolatzen dute Laudio eta Amurrio batzen dituen 12 kilometroko proba ez lehiakorra.
Parte-hartzaile batzuk Amurrioko Juan de Urrutia plazatik abiatuko dira eta beste batzuk Laudioko Herriko plazatik, denak martxoaren 19ko 10:00etan. Amurriotik irtengo direnek Laudio izango dute helmuga, eta alderantziz.
Ez da ohiko norgehiagoka bat, ordea. Alderantzizko denborak hartzen dituzte kontuan eta lehenak edo azkenak irabazi beharrean, tarteko denborek jasotzen dute saria.
Antolatzaileek aurreratu dute ibilbidea laua dela eta edozein pertsonak egin dezakeela. 12 kilometroko luzera du eta Nerbioiko parke linealaren ibilbidea jarraituko du. Gainera, tarteko puntu batean, Luiaondon, hain zuzen ere, deskantsu puntu bat jarriko dute edari eta janarekin.
Izena emateko epea zabalik dago honezkero. 10 euroren truke parte-hartzaileek kamiseta teknikoa, zapia eta txapa oroigarria jasoko dituzte. Gainera, Laudiora zein Amurriora itzultzeko doako autobusak jarriko dituzte.
Antolatzaileek aurreratu dute sariak martxaren osteko egunetan banatuko dituztela Laudioko Udaleko Berdintasun arloan. Izan ere, horretarako denbora guztiak egiaztatu eta tarteko denborak atera behar dituzte.