2021eko martxoaren 5ean, Tubacex enpresako greba mugagabea puri-purian zegoelarik eta Valvospain enpresaren itxieragatik, bi orduko lanuztea deitu zuen Euskal Herriko gehiengo sindikalak (ELA, LAB, ESK eta STEE EILAS erakundeek) eskualdean.
Mobilizazioa sektore ekonomiko guztietara zabaldu zuten, baina Natalia Vanegas Higuera epaileak ondorioztatu du Eusko Jaurlaritzako Hezkuntza Saileko Ikuskaritzak urratu zuela Zaraobe Institutuko eta Fabian Kegorburu Ikastetxeko beharginen greba eskubidea.
Hezkuntza Saileko Ikuskaritzak argudiatu zuen sail bereko zuzendaritzak ez ziola jakinarazi lanuztea deituta zegoenik eta zigor mehatxuak jarri zituen mahai gainean mobilizazioa jarraitu behar zutenen kontra
Izan ere, Administrazioak ez zuen aitortu hezkuntza langileak lanuzte horretara deituak zeudenik eta ondorioz, ohartarazi zien mobilizaziora batzen zirenek zigorra jasotzeko arriskua zutela. Hain zuzen, "justifikaziorik gabe" lanera ez joategatik.
Berez, Ikuskaritzak argudiatu zuen Hezkuntza Saileko Zuzendaritzak ez ziola lanuztearen berririk eman. Azken unean, sindikatuen deien ostean, zuzendaritzak berretsi zuen deialdia, baina Vanegas Higueraren ustez, baimena beranduegi heldu zen.
LAB sindikatuko kide batek argitu du zigor mehatxua orokorra izan zela ikastetxe publikoetan, baina soilik probatu ahal izan dutela Zaraobe eta Fabian Legorburu ikastetxeetakoa.