Beste urte batez Oletako landetako dolmenean erabakitzeko eskubidearen alde elkartzeko deia luzatu du Aiaraldeko Gure Eskuk. Aurten ere ez diote urteroko hitzorduari hutsik egin nahi izan, eta festa eguna antolatuko dute bertan datorren ekainaren 25ean.
"Aberri Egunaren aurreko gauean, inguruko mendi batzuetan argiak piztuko ditugu, Euskal Herriak zutik dirauela aldarrikatzeko"
Gure Eskuk ez du, ordea, erabakitzeko eskubidearen aldeko dinamika egun bakar batera mugatu nahi. Hori dela eta ekintza sorta oparoa prestatu dute datozen hilabeteetarako Aiaraldeko herrietan. Ekintzek herritarrak aktibatzea eta Oletako festara deitzea izango dute helburu.
Aberri eguna abiapuntu
Aberri egunaren bezperan -apirilak 8- abiatuko dute eskualde mailako dinamika. Egun horretan Aiaraldeko zenbait mendi argiztatuko dituzte, 2019an Tologorrin egin zuten bezala. "Aberri Egunaren aurreko gauean, inguruko mendi batzuetan argiak piztuko ditugu, Euskal Herriak zutik dirauela aldarrikatzeko".
Amurrioko Axpaltza eta Burubio, Artziniegako Peñalba eta Laudioko Alpitxu dira argiztatuko dituzten tontorrak. Artziniegan eta Amurrion 20:00etan jarri dute mendira joateko hitzordua, Toñin Luengas frontoian eta Gure Eskuren lokalean hurrenez hurren. Laudioarrak 20:30ean bertaratuko dira Alpitxura, Lusurbeilandatik.
Egitarau oparoa
Aberri eguna atzean utzita ekintza sorta oparoa prestatu du Gure Esku dagok hurrengo hilabeteetarako. "Jarduera ekonomikoa, paisaia, eta eskualdeko historian garrantzi handiko lekuak, zubiak eta bideak hartu ditugu hizketa-gai. Orain berriz ere aurrera joateko asmoz", azaldu dute antolatzaileek.
Gauzak horrela, Lekamañako lubakiak bisitatuko dituzte apirilaren 16an; bisita gidatua egingo dute Ermualdera maiatzaren 7an; eta, ekainaren 4ean Urduñako bideak eta zubiak ezagutuko dituzte Txarlazo Mendi Taldearen eskutik. Iragarri dutenez datozen asteetan emango dute jardueren zehaztapen gehiago.
10 urte erabakitzeko eskubidea aldarrikatzen
Duela 10 urte ekin zion bideari Gure Esku Dagok, erabakitzeko eskubidea erdigunean jartzeko asmoz. Geroztik asko izan dira Euskal Herrian egindako dinamika eta ekitaldiak, eta aurten ere hainbat ekitaldi nazional aurreikusi ditu; hala nola, Tourra ikurrinaz janzteko egindako deialdia.
Aiaraldean 2018an elkartu ziren lehendabizikoz Oletako landetan, eskualdean egin ziren herri galdeketen testuinguruan.